Parlamentu Nasional (PN) halo lei ida hodi kriminaliza ema sira ne’ebe lori sasan kroat iha kareta laran.
Membru Parlamentu (MP), Antoninho Bianco hateten kontiudu husi lei ne’e atu kriminaliza no kondena ema sira ne’ebe ho konsiensia tau sasan kroat hanesan surik, katana, rama ambon iha kareta laran.
Tanba tuir nia, iha Timor aktu ida ne’e buras tebes no halo povu barak inseguru ho situasaun ne’e.
“Lei ne’e iha ona, hein atu halo diskusaun no wainhira lei ne’e aprova sei fo seguransa ba povu,” MP Bianco hateten.
Alende kriminaliza, nia dehan lei ne’e mos sei determina pena hodi fo ba pesoal ne’ebe komete iha aktu ne’e.
Kona ba sei hetan pena prizaun tinan hira, nia dehan ne’e depende ba iha prosesu diskusaun lei ne’e.
Nia mos husu ba polisia sira atu haforsa liu tan volume patroliamentu iha suku no aldeia sira, nune’e bele evita aktu krimi labele buras iha rai laran, inklui dezafia kriminozu sira nia hanoin hodi labele halo krimi.
“Patrulhamentu metin, ema ne’ebe atu halo krimi mos tauk, tanba prezensa polisia ne’e iha fatin hotu,” nia hateten.
Mesmu Polisia Nasional Timor-Leste mos halo esforsu lubuk ida ona, hanesan monta Ofisiais Polisia Suku iha sukus hodi asegura seguransa, maibe nia dehan ne’e seiduak to’o, tanba sira mos iha difikuldade oi-oin.
Iha parte seluk Segundu Komandante munisipiu Dili, Superintendente Asistente Euclides Belo, hateten iha tempu kalan polisia sempre halo patrulhamentu ne’ebe rutina iha bairo no suku sira.
“Ami sempre halo patrulhamentu iha tempu kalan hodi prevene konflito no krimi sira,” nia hateten.
Kona ba lei kondena pesoal ne’ebe lori kroat, nia dehan ne’e pasu positivu ida, tanba iha tinan kotuk (2016) PNTL prende sasan krot barak, maibe la kondena autor.
