Familia pasiente husu governu aloka orsamentu ba ospital nasional hodi fornese mos hahan ba familia pasiente ne’ebe mai husi munisipius, tanba balun laiha familia iha Dili.
Jacinto Goveia Leite, nudar familia pasiente konsidera governu halo diskriminasaun ba sira tanba pasiente ne’ebe halo referral ba rai liur governu apoia inklui alojamentu no alimentasaun durante tratamentu maibe sira ne’ebe referral husi munisipiu laiha.
“Hau triste, tanba ba rai liur sira fo osan, maibe iha rai laran atu fo hahan bikan ida ba ami sira hein pasiente mos laiha, ne’e governu nia hanoin oinsa?,” nia kestiona, iha ospital nasional.
Maibe, nia agradese ba governu tanba apoia ona aviaun hodi tula nia fen husi munisipio Covalima mai iha ospital nasional, maske situasaun balun presiza tau konsidera.
Nia kaben, halo evakuasaun emergensia mai iha Dili tanba iha komplikasaun ne’ebe labele partu normal, tenke halo operasaun.
Entretantu Membru Komisaun F (saude, edukasaun, kultura, veteranus e igualidade jeneru), Eladio Faculto husu ministerio relevante atu halo estudu ida ba kestaun ne’e, tanba iha familia balun laiha duni familia iha Dili.
“Hau hanoin tenke iha esplikasaun husi governu kona ba sira nia politika atu responde ba situasaun ida ne’e,” nia hateten.
Kona ba transferensia ba rai liur, nia dehan ne’e governu iha obrigasaun atu apoiu tanba laiha familia ida mak hela iha ne’eba, maibe iha rai laran maioria familia hela iha Dili, problema mak kustu moris ne’ebe karun.
Hatan ba kestaun ne’e Diretor Nasional Apoiu Ospitalar, Horacio Sarmento hateten transfrensia moras iha rai laran governu apoiu deit transporte maibe kona ba alimenasaun ne’e laiha.
“Governu la preve orsamentu ba ida ne’e, maibe iha ospital referral balun ami fo orientasaun atu fo hahan ba familia ida ne’ebe akompanha,” nia hateten.
Nia hateten, katak iha ospital nasional la implementa tanba numeru pasiente barak no dieta ne’ebe la hanesan.
Pasiente ne’ebe halo referral ba rai liur, nia dehan governu fo apoiu tomak hahu husi tiket aviaun, alojamentu inklui osan han nian $20 kada loron ba pasiente no familia ida.
