Durante tinan 2016, Servisu Investigasaun Kriminal (SIK) konsege registu kazu krimi hamutuk 4049.
Segundu Komandante Jeral Polisia Nasional Timor-Leste (PNTL), Komisariu Faustino da Costa hateten husi numeru ne’e, kazu krimi ofensas integridade fizika simples mak aas ho total 969 kazus.
Kazu hirak ne’e, nia hateten balun hetan ona desizaun husi tribunal no sei iha prosesu nia laran.
“Ita haree kazu sira ne’e ho numeru ne’ebe bo’ot, entaun komunidade no polisia presiza koopera ba malu hodi redus numeru ne’e,” Komisariu Costa hateten, iha Dili.
Tanba nia dehan, dala ruma iha konflito ruma akontese iha bairu ida, wainhira polisia tuun ba baze, maibe komunidade lakohi koopera hodi fo informasaun.
Entaun nia dehan, ne’e fo opportunidade ba kriminozu sira atu kontinua involve iha krimi no halo krimi.
“Wainhira kareta patruliamentu to’o iha fatin, ema hotu nega dehan autor sira ne’e husi bairu seluk, ne’e hatudu katak kooperasaun komunidade sei minimu,” nia preokupa.
Maibe nia orgulhu, munisipiu Manufahi iha tinan 2016 registu deit kazu krimi hamutuk 48 kompara ho munisipiu sira seluk.
Iha parte seluk Deputada Cesar Valente, hateten kazu krimi ne’ebe registradu kategoria aas e presiza halo prevensaun.
“Ita nia kazu krimi kontinua aas, entaun ne’e hatudu presiza servisu maka’as liu tan,” nia hateten.
Nia dehan, prevensaun ba krimi ne’e la’os servisu ema ida nian deit, maibe ema hotu nian, tanba ne’e presiza kolabora ba malu.
