Governu Timor-Leste estabelese ona Sekretariadu Joventude Comunidade Paises da Lingua Portugues (CPLP), ho objetivu atu hametin lasu amizade entre pais membru no halo advokasia ba problema foinsa’e sira nian iha nasaun membrus no mundu.
Sekretariadu ida ne’e fo mos oportunidade espesifiku ba foinsa’e sira atu aprende no dezenvolve aan liu husi eventu diskusaun sira ne’ebe sei halo iha rede foinsa’e CPLP nian.
Prezidente Conselho Nasional Joventude (CNJTL), Maria Dadi S. Magno hateten papel importante ida husi joventude CPLP nian mak halo advokasia ba estado membru pais sira hodi responde ba iha problemas ne’ebe identifikadu iha forum joventude CPLP tinan kotuk (2015).
Nia dehan, iha forum joventude ne’e nasaun membru sira hamosu deklarasaun ida hanaran Deklarasaun Dili ne’ebe mai ho asuntu importante hat ; mak formasaun lingua Portugues, Dezempregu, Igualidade Jeneru no Edukasaun.
“Ita kria sekretariado ne’e ho nia funsaun halo koordenasaun ho nasaun pais membru sira atu realiza mehi ne’ebe ita iha, liu –liu ba dezenvolvimentu foinsa’e sira nian,” nia hateten iha serimonia lansamentu ba sekretariadu iha Farol, Dili.
Nia informa nasaun membru balun seidauk iha sekretariadu joventude inklui São Tome Pricipe, Guine Bissau, Cabo Verde, Mozambique, maibe Timor-Leste hanesan inisiativador ba hanoin ida ne’e tenke hahu maske ho grupo ne’ebe ki’ik.
Nia dehan, iha estruturas sekretariadu ida ne’e sei iha reprezentante jovens husi registensia, defisiensia, rural no joven LGBT nian.
Timor –Leste hanesan nasaun ida husi Regiaun Sudeste Aziatiku ne’ebe hola parte iha organizasaun CPLP iha 2012, no iha tinan 2014 Timor –Leste sai uma nain ba enkontru xefe estado paises membru CPLP no simu mos responsabilidade nudar prezidente ba organizasaun CPLP nian durante tinan rua (2014-2016).
Entretantu Sekretario Estado Joventude e Desportu (SEJD), Leovigildo da Costa Hornai hateten governu optimista katak sekretariadu ida ne’e sei servisu ho diak, liu-liu halo advokasia ba problemas ne’ebe foinsa’e sira hasoru iha area rural, nasional no mundu.
“Ita hein katak sira bele koalia bazeia ba realidade Timor nian, liu –liu halo advokasia kona ba problema ne’ebe jovens hasoru,” nia esperansa.
Tanba ne’e, nia husu ba estrutura sira atu servisu ho espiritu voluntario, labele haree ba osan deit maibe importante oinsa mak bele tulun malu, liu –liu foinsa’e sira seluk ne’ebe hasoru problema.
