Tribunal Munisipal Dili (TMD) hala’o julgamentu ba kazu integridade fisika simples ho forma violensia domestika ne’ebe involve arguido (la’en) basa, tuku e tebe vitima (fen), tanba husik hela nia oan hodi ba reza.
Tuir akuzasaun husi Ministeriu Publiku ne’ebe lee sai husi juis prezidente, katak iha dia 10/5/2015 lezada ba reza iha vizinhu nia uma no husik hela sira nia oan (tinan 3 no 7) iha uma mesak.
Iha altura ne’eba vitima fo konfiansa ba oan tinan hitu (oan primeiru) ne’e sei hein nia alin ho kuidadu, e wainhira arguido fila husi servisu aserta sira nia oan segundu (tinan tolu) ne’e tanis hela.
Entaun wainhira vitima fila husi reza, arguido duun vitima abandona labarik sira iha uma, ho ida ne’e vitima foin hatan ba reza, arguido lolo kedas basa isin ida iha lezada nia hasan, no tuku lezada to’o monu depois tebe tan vitima.
Hafoin ne’e, vitima halai ba liur hodi hakilar no iha tempu hanesan vitima nia maun haree entaun ba kesar kedas arguido iha estasaun polisia Comoro.
Wainhira lee sai akuzasaun hirak ne’e juis prezidente husu ba arguido atu hili koalia ou nonok, maibe arguido hili koalia katak, arguido rekonese duni hahalok ne’ebe mak nia halo ba vitima iha momentu ne’eba.
“Hau husu ona deskulpa ba hau nia ferik oan, no agora ami nain rua diak malu ona,” arguido deklara iha audiensia julgamentu, iha TMD.
Alende ne’e, nia dehan arguido mos fo sala ona ba familia husi vitima nian tuir kustume tradisaun nian.
Desde akontesementu ne’e, arguido mos nunka halo tan attitude hanesan durante ne’e.
Mesmu nune’e, Ministeiru Publiku nafatin husu ba tribunal atu fo pena ne’ebe adekuadu ba arguido, tanba arguido komete krimi integridade fisika simples ho forma violensia domestika ne’ebe nudar krime publiku ne’ebe hatuur iha lei kodigu penal artigu 145.
Entretantu depois rona tiha deklarasaun hirak ne’e juis prezidente deside fo pena prizaun tinan rua no suspende ba tinan ida.
