Mane (arguido) ida ho konsiensia basa vitima ne’ebe nudar nia namarada iha fatin publiku, tanba deit vitima husu atu hakotu (putus) sira nia relasaun domin.
Iha audensia julgamentu, arguido konfesa ba tribunal katak, iha Kuarta (19/07/2015), tuku 10 dadersan iha kampus Universidade Nasional Timor-Leste (UNTL) arguido ba hein vitima, ho intensaun wainhira vitima fila arguido atu tula ba uma, maibe iha altura ne’eba vitima sai husi klase arguido koalia didiak atu haruka vitima fila liu ba uma, maibe nia lakohi.
Entaun iha momentu ne’eba arguido ba kaer vitima nia liman hodi dehan “ita fila ona”, maibe vitima lakohi fila hodi dehan fali “ita para ona, hau lakohi ona o”, konsidera liafuan ne’e soke arguido nia fuan, entaun arguido ho liman basa bosok deit vitima nia hasan.
Maibe tanba iha tempu ne’eba vitima nia kolega sira haree no hanoin arguido atu tuku vitima, entaun sira hakilar e ikus mai arguido halai tiha ba uma.
“Ha’u kaer nia liman atu sa’e motor, maibe nia (vitima) lakohi no koalia fali liafuan ne’ebe la tama iha ita nia laran,” arguido deklara iha audensia julgamentu, iha Tribunal Munisipal Dili.
Nia mos rekonese, katak aktu ne’ebe nia halo ne’e ladun diak no arguido sente arepende ho hahalok ne’ebe mak nia komete ona.
Iha fatin hanesan juis prezidente husu ba vitima atu hili koalia ou nonok, e vitima hili koalia hodi dehan ba tribunal katak, arguido nudar mane ida ne’ebe violentu no durante namora tinan ida nia laran sira nia relasaun nunka harmonia, problema oituan baku.
Tanba ne’e vitima deside atu husu para iha momentu ne’eba, nune’e nia bele sente livre husi nia hahalok temperamentu ne’e.
Vitima mos deklara, katak agora arguido ho vitima nudar kolega deit ona no laiha tan relasaun namora.
“Ami deside atu husik malu ona, agora ami kolega deit,” vitima deklara.
Iha parte seluk Ministeriu Publiku akuza arguido ho artigu 145 kodigu penal ho tipu kazu ofensas integridade fizika simples, tanba ne’e husu ba tribunal atu fo pena ne’ebe adekuadu hodi nune’e arguido labele komete tan krime hanesan iha futuru.
Entrentantu husi parte defeza arguido nian husu ba tribunal atu absolve tiha kazu ne’e, tanba arguido basa bosok deit no vitima la hetan kanek ruma e alende ne’e arguido mos rekonese tiha katak nia mak sala.
Hafoin rona tiha deklarasaun husi arguido no vitima, juis prezidente deside fo pena suspensaun tinan ida ba arguido.
