Membru Parlamentu Francisco Andrade, kestiona konstruksaun estrada ligasaun suku Mota Masin ba suku Aimanu, munisipiu Suai to’o oras ne’e dadaun paradu no governu la tau matan.
Nia hateten, iha tinan 2014 governu konsege kontrata kompania balun hodi konstrui estrada ne’e maibe ikus mai paradu tiha.
“Komunidade iha suku ne’eba sente triste tebes,” nia hateten.
Tanba komunidade iha suku rua ne’e, nia dehan tinan barak ona la asesu ba estrada ne’ebe diak, inklui sofre ba rai rahun no bainhira udan bo’ot komunidade iha area ne’eba labele halo vijilansia.
Enkuantu kada tinan, nia dehan hahu husi 2009 Orsamentu Jeral do Estadu (OJE) aloka barak liu ba parte infra-estruturas, maibe realidade nunka rezolvidu
“Osan barak liu ba hadia estrada, maibe tanba saida mak nunka rezolvidu,” nia kestiona.
Tanba ne’e, nia sujere governu presiza identifika dezafiu no frakeza iha ne’ebe, atu nune’e bele hadia, ladun diak sekuandu kada tinan problema infra-estruturas sempre komunidade preokupa.
Hatan ba kestaun ne’e Ministru Obras Publiku, Transportes e Komunikasaun (MOPTK), Gastao Sousa hateten governu iha planu hadia estrada rural maibe depende estrada iha suku rua ne’e, tama iha lista atu hadia ou la’e.
“Ita sei hadia estrada rural, maibe la’os dala ida deit, faze pur faze, tanba ne’e sekuandu tinan ne’e la halo, tinan oin mai ita sei haree,” nia hateten.
Maibe iha planu estrategiku hatuur klarumente, katak iha tinan 2030 komunidade hotu-hotu hetan ona estrada ne’ebe diak e agora, nia dehan dadaun governu esforsu hela atu atinji ida ne’e.
