Feto (potensial) nain 300 (husi munisipius 12 inklui regiaun espesial Oe-Cusse) mak konfirmadu no prontu konkore ho mane sira iha elisaun suku ne’ebe sei hala’o iha fulan Outubru tinan 2016 ne’e.
Porta voz Komisaun 100% hau pronto, Yasinta Lujina hateten organizasaun feto kontinua kapasita no fo akompanhamentu ba feto potensial sira iha prosesu aprezenta kandidatura to’o iha elisaun.
“Ita enkoraja feto sira atu ba hatudu sira nia kapasidade no abilidade ba komunidade katak sira bele halo dezenvolvimentu iha suku laran,” nia hateten iha Dili.
Maske esforsu barak mak organizasaun feto sira halo ona, maibe nia dehan nafatin iha obstaklu ne’ebe feto sira infrenta, liu –liu apoiu sosiedade nian ba iha kandidatura feto sei minimu tebes.
Alende ne’e, nia hateten organizasaun feto sira mos halo sosializasaun ba votantes no kandidatura sira kona ba lei suku nian, mekanizmu elisaun inklui mos leis ne’ebe asegura feto nia partisipasaun, atu sira iha iha konesementu no hili ema ne’ebe iha kapasidade duni.
Nia dehan, mekanismu elisaun suku periodu tinan ne’e la hanesan ho periodu sira liu ba, tanba agora elisaun direita ba ema, la’os pakote.
Nia informa, elisaun sei hala’o iha asembleia aldeia hodi hili xefe suku, xefe aldeia, delegada no delegado. Depois membru konseilho eleitu sei hili fali lia nain no reprejentante joventude feto no mane.
“Importante 442 sukus ne’e tenke iha kandidata feto, tanba lei garantia, atu hili ka la’e ne’e depende ba votante sira,” nia dehan.
Kandidatu feto ba periodu ida ne’e, nia dehan aas liu kompara ho periodu sira seluk, tanba feto barak mak brani ona sai ba publiku hodi kaer ukun.
Iha parte seluk, Prezidente asosiasaun feto munisipio Ermera, Maria Exposto hateten Ermera iha kandidata xefe suku feto nain 39 mak pronto avansa.
“Sira 39 ne’e positive hetan ona apoiantes no agora daduan sira tuir hela formasaun no sira hahu halo dialogu ho komunidade sira,” nia hateten.
Alende ba xefe suku, nia dehan sira mos iha feto 200 resin mak pronto kandidata aan ba xefe aldeia.
Elisaun periodu 2009, nia dehan munisipio Ermera iha deit feto nain ida mak eleitu ba iha xefe suku husi 52 sukus, maibe tinan ne’e numeru sei sa’e.
Enkuantu Komisaun 100% hau pronto ne’e estabelese tinan 2015 husi organiasaun feto sira, ho objetivu halo kampanha no kapasita feto potensial sira atu kandidata aan iha elisaun suku tinan ne’e.
