Governu liu husi Sekretariadu Estadu Terras no Propriedade (SETP) sei hasai komunidade ne’ebe hela iha area Kaikoli, iha tempu badak.
Sekretariu Estadu Jaime Lopes, dehan area husi Kuarte Jeral to’o iha Centru Convensoens Dili, Ministeriu Justisa liu husi Terras Proridade oferese ona ba instituisaun Polisia Nasional Timor-Leste (PNTL) hodi halo alargamentu ba sira nia edifisiu, no komunidade ne’ebe hela iha ne’eba tenke sai.
“Sira hakarak ga la hakarak, sira tenke sai husi fatin ne’eba iha tinan ida ne’e,” SE Lopes hateten.
Tanba nia dehan, hahu tinan 2017 PNTL hahu halo ona konstruksaun ba sira nia edifisu ne’e.
Antes ne’e, nia informa governu konsege halo ona konsiliasaun ho komunidade ne’ebe hela iha fatin ne’eba, inklui husu atu sira fo konta bankaria ba governu hodi transfere tulun humanitaria, maibe sira abandona hanoin diakn ne’e.
“Nain rua deit mak konsege fo ona, maibe restu ne’e sei ulun to’os nafatin,” nia dehan.
Bazea ba dadus husi tekniku levantamentu, nia dehan komunidade uma kain 20 mak sei afetadu ba eviksaun ida ne’e.
Iha parte seluk Xefe Suku Kaikoli, Hipolito Marques Sarmento, hateten komunidade pronto atu kolabora maibe governu tenke kria kondisaun ne’ebe mak diak ba sira.
“Komunidade pronto atu kolabora, so iha balun mak seidauk aseita ho desizaun governu nian ne’e,” nia hateten.
Tanba nia dehan governu sei fo deit osan ho montante $2000 kada uma, ne’e komunidade la aseita.
“Sira lakohi tanba osan ne’e la to’o,” nia dehan.
Nia dehan, komunidade afetadu sira ne’e hela kleur ona iha fatin ne’eba, tanba ne’e wainhira sira sai tenke sosa rai no $2000 la sufsiente.
“Hira mak halo uma no hirak mak uza ba han hemu,” nia dehan.
