Timor-Leste Rotary Club primeiru estabelese iha Dili ho nia objetivu atu supporta komunidadades iha area rural.
Organizasaun lokal Rotary Club of Dili Lafaek Timor-Leste (ROCDLAF-TL) ida ne’e fo oportunidade espesifiku ba foinsa’e sira ne’ebe iha interese halo servisu umanitariu.
Prezidente ROCDLAF-TL, Silveiro Martins Pinto hateten organizasaun foinsa’e ne’e harii ho objetivu halibur no ekoraja foinsa’e sira hotu atu fahe buat ne’ebe sira hetan ba komunidades iha area remotas liu husi apoia humanitarian sira.
Apoia sosial ne’ebe sira fo bazeia ba nesesidade komunidade nian, tanba fundus mai husi jovens ne’ebe halibur aan iha organizasaun ida ne’e.
Nia dehan, ekipa halo ona identifikasaun ba nesesidade komunidades iha munisipio Baucau no Lautem ne’ebe iha tempu badak sei responde.
“Ami sei dada bee moos iha munisipio Baucau, postu administrative Baguia no munisipio Lautem iha Lospalos,” nia hateten iha serimonia lansamentu organizasaun iha salaun MSS Kaikoli, Dili.
Alende ne’e, nia hateten programa seluk mak kapasitasaun no sosializasaun ba joven sira kona ba meiu ambiente no asuntu droga, jovens presiza informasaun hodi bele prevene aan husi lasu ne’ebe iha.
Nia informa, ROCDLAF-TL nakloke ba foinsa’e hotu ne’ebe iha ona servisu atu sai membru no involve iha atividade hodi fo tulun povu sira iha area rural.
Atu sai membru ba ROCDLAF-TL, nia dehan tenke iha ona servisu tanba iha ne’e la’os atu hetan osan maibe fahe buat ne’ebe ita hetan hodi ajuda komunidade ne’ebe presiza.
Iha dia 18 Junu tinan 2016, foinsa’e feto no mane nain 40 oficialmente deklara ba publiku ROCDLAF-TL hanesan organizasaun local ida ne’ebe sei servisu maka’as fo tulun ba komunidade sira iha Timor –Leste.
Entretantu Governor Rotary Club of Cairns Sunrise, Mike Woods hato’o sira nia komitmentu apoia organizasaun (foun) ida ne’e hodi ajuda no fo tulun ba komunidade sira iha Timor –Leste.
“Rotary international sei apoia (sponsor) organizasaun foun ne’e atu fo tulun sosial ba komunidade sira iha Timor –Leste,” nia hateten.
Nia dehan, servisu ne’ebe organizasaun foun ida ne’e presiza halo mak buka identifika nesesidade komunidade nian no buka fundus hodi responde ba nesesidade sira.
Nia espera, rotary club foun ida ne’e sei aprende barak liu tan no buka involve aan iha projetus sosial sira ne’ebe iha atu responde ba iha ejijensia komunidade sira nian.
Enkuantu reprezentante ida husi Rotary Club Melbourne, entrega mos tasu osan mean ida ba iha prezidente ROCDLAF-TL Silverio Martins Pinto, uza hodi halo esmola no halibur osan husi membru sira hodi tulun komunidades.
