Ministerio Edukasaun (ME) fo autorizasaun ba ensino baziku balun hodi rekruta profesores casual hodi responde ba nesesidade eskolas nian, tanba profesores atu hanorin disiplina espesifiku sei limitado.
Vise Ministra Edukasaun, Dulce Jesus Soares, hateten iha eskolas ensino baziku balun sei menus profesores disiplina hodi hanorin alunu sira.
“Loos duni iha fulan hirak mai ne’e ministerio fo duni autorizasaun ba eskola balun ne’ebe identifika falta profesores area espesifika sira hodi rekruta profesores casual atu hanorin alunu sira,” Vise Ministra Soares hateten, iha Dili.
Nia rekonese, katak numeru profesores iha MS bo’ot maibe profesores disiplina sira menus tebes, tanba rekrutamentu ne’ebe halo la tuir nesesidade.
“Eskola balun liu –liu ensino baziku iha terseiru siklu aplika profesores disiplina la’os ona profesores turma, entaun presiza profesores disiplina,” nia hateten.
Nia informa, ME dadaun ne’e halo hela esforsu bo’ot hodi hadia problema hirak ne’e katak kada eskola tenke iha kuadru pesoal atu bele identifika lolos profesores no disiplina ne’ebe sira hanorin.
Oinsa ho pagamentu ba profesores casual, vise ministra la fo esplikasaun klaru knoa ba asuntu ne’e.
Tinan kotuk (2015) Parlamentu Nasional aprova orsamentu $56 miloens ba vensimentu profesores permanentes no kontratadu sira.
Oras ne’e dadaun Ministerio Edukasaun iha profesores voluntario ne’ebe kontratadu ona hamutuk $4 mil resin.
Iha parte seluk Membru Komisaun F (saude, edukasaun, kultura, veteranus no igualidade jeneru), Deputadu Leonel Marçal preokupa tebes ho prezensa profesores casual, tanba problemas kona ba profesores voluntarius mos seidauk rezolve.
“Agora mosu tan fali ona profesores casual,” nia preokupa.
Nia espera, ho prezensa profesores casual sei la hamosu problemas iha loron ikus.
