Tinan ne’e (2016) Parlamentu Nasional aloka orsamentu $260 mil ba Sekretariadu Estado apoiu sosio ekonomia feto (SEM) atu apoia grupo feto sira hala’o negosio hodi sustenta sira nia familia.
Sekretaria Estado ba Apoiu Sosio Ekonomia Feto, Veneranda Lemos, hateten VI governu iha politika klaru hodi hakbi’it ekonomia feto, tanba ne’e estabelese sekretario estado ida haree ba asuntu ida ne’e.
“Ami tau atensaun maka’as ba hakbi’it ekonomia feto liu husi transferensia publikas,” SE Lemos hateten, iha salaun Tower Fatu Hada, Dili.
Nia informa, SEM simu ona proposta 125 husi grupo feto sira e sei halo avaliasaun inklui halo verifikasaun ba fatin negosio ne’ebe iha tuir poposta.
Ba grupos ne’ebe liu iha prosesu ne’e, nia dehan, sira sei tuir formasaun antes simu osan hala’o sira nia atividades negosiu.
“Tuir fali kapasitasaun oinsa halo negosio liga ba jestaun ba negosio no orsamentu ne’ebe simu,” nia hateten.
Hahu tinan 2008-2014, nia hateten, governu liu husi Sekretaria Estado ba Promosaun Igualidade (agora SEM) apoia ona grupos feto hamutuk 399 iha teritorio tomak ho total orsamentu $700 mil resin, maibe grupos ne’e maioria la eziste, maske sira hetan osan.
Iha parte seluk Prezidente Komisaun F (saude, edukasaun, kultura, veteranus e igualidade jeneru), Deputadu Virgilio da Costa Hornai, hateten kada tinan parlamentu aloka osan liu husi transferensia publika hodi apoia grupo feto sira.
“Maibe realidade osan sira ne’e laiha rezultadu, sira simu tiha osan la halo atividades,” nia preokupa.
Tanba ne’e, nia sujere ba SEM atu kanaliza apoiu sira ne’e liu husi BNCTL, nune’e sira bele iha responsabilidade ba osan ne’ebe sira foti hanesan emprestimu ho funan ne’ebe ki’ik hodi garantia sustentabilidade.
