Membru Parlamentu (MP), Deputadu Francisco Branco, konsidera osan $44.086 mil ne’ebe governu fakar ba konstrusaun edifisiu Ministeriu Finansas saugate deit, tanba to’o agora la uja no husik abandona.
Nia kestiona, tanba edifisiu ne’e rasik hahu konstrui iha tinan 2011 no remata inklui inagura iha tinan 2014.
“Halo tiha maibe la uja, ami bele dehan governu fakar osan saugate deit,” MP Branco kestiona, iha Parlamentu Nasional.
Husi inisiu kedas Parlamentu Nasional la aseita harii edifisiu ne’e, maibe nia dehan, governu mai ho razaun nudar estadu Timor presiza iha edifisiu ne’ebe diak no dignu hodi siviliza no orgulho.
Nia esklarese, iha tinan 2011 governu aloka $5.430 mil, 2012 aumenta tan $7.392 mil, iha tinan 2013 $9.810 mil, 2014 aloka $15.460 mil no iha 2015 $6.820 mil e total mak $44.912 mil. Enkuantu ba trabalhu interior gastus $3.422 mil inklui back up edifisiu nian hamutuk $4 miloens.
Tanba ne’e, nia husu, ba governu atu mai halo justifikasaun iha uma fukun Parlamentu Nasional.
“Tenke responsabiliza ba situasaun sira ne’e, labele husik hanesan ne’e deit,” nia dehan.
Hatan ba kestaun ne’e Vise Ministru Finansas, Helder Lopes, rekonese katak edifisiu prontu kleur ona maibe seidauk utiliza, tanba sei halo hela instalasaun interior fitment no data center.
Kona ba instalasaun interior fitment, nia dehan, ne’e monta kadeiras no halo separadu ba fatin servisu idak-idak nian e kona ba data center ne’e halo formatu komputador sira no liga eletrisidade.
“Bainhira remata iha fulan Agostu, entaun ami bele utiliza ona edifisu ne’e,”nia hateten.
Nia klarifika mos , katak edifisiu ne’e iha kondisaun ne’ebe diak, tanba iha rumoris balun ne’ebe espalha iha publiku katak edifisiu ne’e aat ona. “Edifisiu diak hela no rumoris ne’e la loos,” nia hateten.
