Vise Diretor organizasaun Fundasaun Mahein (FM), Joao Almeida, lamentavel ho servisus Ofisiais Polisia Suku (OPS) ne’ebe sempre tarde halo atendementu ba kazu krimi ruma ne’ebe akontese iha komunidade nia le’et.
Kauza husi atendementu tarde, nia hateten, dala barak rezulta komunidade halo justisa rasik hodi oho malu no baku malu.
“Antendementu tarde no dala ruma la atende liu, tanba ne’e talves komunidade uza forsa hodi hasoru malu,” Almeida kestiona, iha Dli.
Tuir nia, ida ne’e tanba sistema kolokasaun OPS iha suku mak ladun organizadu, tanba OPS la hela iha fatin ne’ebe kolokadu.
“Nia servisu iha fatin ida, maibe hela iha fatin seluk,” nia hateten.
Tanba ne’e, nia sujere, ba komando atu haforsa papel OPS nian, kria hela fatin no fasilidade ne’ebe suporta servisu OPS sira iha baze hodi prevene konflitu labele sai ba krimi.
Hatan ba kestaun ne’e Komandante Jeral Polisia Nasional Timor-Leste (PNTL), Komisariu Julio Hornai, rekonese kestaun ne’e maibe komunidade tenke iha konsiensia atu komprende, tanba dala ruma ofisiais sira ne’e la’os atende kazu ida deit kada loron.
“Se iha aldeia ida akontese problema nia atende hela, depois ida fali telefhone, entaun nia tenke atende ida primeiru ne’e hotu tiha mak nia foin ba fali ida seluk, situasaun sira ne’e mak dala ruma akontese,” Komisariu Hornai hateten.
Maibe, nia dehan, agora dadaun PNTL hola ona motor hamutuk 200 resin no radio komunikasaun balun hodi oferese ba OPS sira atu hala’o servisu iha baze.
“Ita mos prepara alimentasaun ba sira, ita espera ba future si bele servisu diak liu tan ona,” nia esperansa.
