Membru Parlamentu, Deputada Ilda Maria da Conçeicão, ejiji ba Ministerio Saude atu hadia kareta multi funsaun iha Sentru Saude postu administrative Uato Carbau (SSUC) ne’ebe tinan rua ona la funsiona.
Nia hateten, durante ne’e pasiente sira ne’ebe hela iha sukus (area rural) bainhira presiza halo evakuasaun, sira tenke husu ajuda kompania sira tula iha kareta trek.
“Inan feto ida atu partus, sira husu kompania nia trek hodi tula inan ne’e mai partus iha ospital referral Baucau,” Deputada Ilda kestiona, iha plenaria Parlamentu Nasional.
Nia hatutan, komunidades preokupa tanba kompania ne’ebe durante ne’e ajuda sira halo evakuasaun bainhira ema ruma moras, sira nia servisu remata ona.
“Ministerio Saude tenke hadia kareta ne’e, nune’e bele evakua ema moras sira bainhira presiza,” nia ejiji.
Entretantu komunidade Francisco Guterres, hateten kareta multi funsaun iha sentru saude ne’e kleur ona kareta la hala’o nia funsaun, tanba aat.
Nia dehan, komunidades ne’ebe hela do’ok (24 kilometrus) husi postu administrative liu –liu inan feto sira ne’ebe atu partus, tenke ba hela iha familia sira ne’ebe besik sentru saude hodi hein partus, tanba kareta laiha atu ba halo evakuasaun bainhira situasaun emergensia.
“Dala ruma pasiente sira liu –liu inan isin rua atu partus, sira husu ajuda ba ema ne’ebe iha kareta tula, kuandu laiha sira uza karosa tula pasiente dudu ba fasilidade saude,” nia kestiona.
