Komandante Servisu Investigasaun Kriminal (SIK), Inspektor Xefe Ludgerio Lay, hateten SIK konsege prende makina sloot hamutuk 124, tanba kompania la selu taxa ba estadu.
Komandante Lay, hateten SIK prende makina hirak ne’e iha Timor Plaza hamutuk 42, Audian 43 no Hudi Laran 39, tanba kompania la selu taxa ba estadu.
“Kuaze tinan ida ona e agora dadaun kazu ne’e tama ona iha tribunal no halo hela prosesu primeiru interogatoriu,” Komandante Lay hateten, iha Dili.
Antes prende makina hirak ne’e, nia dehan, SIK hetan keixa husi governu liu husi Ministeriu Comersiu Industria no Ambiente (MCIA) kona ba kompania ne’ebe viola ona regras.
“Ami hamutuk ho sira ba identifika fatin hirak ne’e, depois ami haree e loos duni ema sira ne’e la selu taxa no viola regras, entaun ami prende,” nia hateten.
Nia esplika, makina sloot ne’e hanesan jogu ida, maibe tau osan, jogu ne’e bain-bain oferese ba labarik sira no ema bo’ot.
Iha fatin seluk Deputado Francisco da Costa, hateten atitude ida ne’e hatudu laiha konsistensia atu implementa regras ne’ebe vigor ona.
“Sidadaun hotu-hotu tenke hakruuk ba lei no regras ne’ebe mak iha ona,” Deputadu da Costa sujere.
Tanba, nia dehan, estadu Timor-Leste nunka taka dalan ba sidadaun ne’ebe deit mak hakarak mai investe iha Timor, maibe tenke kumpri regras ne’ebe iha ona.
“Husu lisensa ita fo, maibe tenke fo rendementu mos ba estadu liu husi selu taxa,” nia dehan.
Iha parte seluk komunidade Lucio Amaral, husu ba polisia atu kontinua buka tuir tanba iha Dili laran ne’e iha jogu barak mak illegal, balun laiha lisensa, balun iha maibe la selu taxa ne’e barak los.
“Polisia labele iha fatin deit, tenke buka informasaun tanba iha Dili laran ne’e jogu barak mak sei illegal,” nia sujere.
