Vise Diretor Fundasaun Mahein (FM), Joao Almeida, hateten Fundasaun Mahein hahu halo sosializasaun kona ba asuntu hat (droga, trafiku humanu, alcohol no asidente trafiku) ne’ebe konsdiera risku no ameasadu ba komunidades.
Nia hateten, komunidades presiza hatene informasaun kona ba asuntu hat ne’e, tanba asuntu hat ne’e agora dadaun sai preokupasaun ema hotu nian.
“Ita hotu akompanha no halo konkluzaun ida, katak Timor sai hanesan fatin transito no mos sai fatin sirkulasuan ba droga, entaun ita komunidades presiza hatene informasaun kona ba buat hirak ne’e,” Almeida hateten, iha Dili.
Kona ba trafiku humanu, nia hateten, dadaun ne’e ema utiliza maneiras oin-oin buka ema hodi involve iha vida prostituisaun, entaun presiza sosializa asuntu ne’e ba komunidade hodi sira bele hatene maneiras-maneiras saida mak ema uza hodi bosok.
“Ema haree Timor hanesan fatin origin, tanba ne’e dala ruma ema uza maneiras oin-oin, mobiliza ema ne’be la hatene hodi involve ba aktu trafiku humanu,” nia hateten.
Nia hatutan, nune’e mos asidente trafiku ne’be kada tinan sempre ho volume aas ne’ebe sai mos asuntu prioridade ne’ebe mak komunidade presiza hatene, nune’e sira bele kuidadu wainhira lori veilukus iha estradas.
“Tanba relatoriu hatudu 80% fator humana, no 30% fator estrada,” nia dehan.
Enkuantu sosializasaun ne’e Fundasaun Mahein realize iha eskola-eskola nune’e mos ba komunidade iha nivel munisipiu no postu administrative sira.
Iha parte seluk Membru Parlamentu Nasional, Deputada Albina Marcal, apresia FM nia atividades ne’e, tanba hasa’e nivel konesementu komunidades nian kona ba asuntu hirak ne’e.
“Ne’e diak, tanba iha komunidade balun mak la hatene kona ba buat sira ne’e,” nia hateten.
Tanba ne’e, nia sujere ba FM, atu sosializasaun ne’e tenke tama to’o iha nivel sukus, nune’e komunidades iha area remotas mos bele hatene hotu.
