Membru Parlamentu (MP) Nasional, Deputadu Arao Noe, hateten sede sukus ne’ebe estabelese iha munisipius 13 barak mak aat dadaun ona, tanba ne’e husu ba governu atu hadia tiha.
Hanesan iha munisipiu Dili, nia dehan, sede suku no sede aldeia barak mak aat ona, nune’e mos iha munisipiu sira seluk liu-liu iha area remotas, lolos governu tenke hadia hodi nune’e funsionamentu servisu iha sede sukus ne’e bele la’o ho diak.
“Balun komesa aat no balun la halo atividades e kleur-kleur komesa aat ona, tanba ne’e mak administrador munisipiu sira tenke halo kontrolu mos ba iha funsionamentu sede suku sira ne’e,” Deputadu Noe hateten, iha Parlamentu Nasional.
Nia dehan, lolos xefe suku sira mos tenke iha inisiativa, wainhira haree sede sukus aat ona tenke iha inisiativa atu halo proposta ba governu atu hadia.
“Xefe suku tenke iha ona planu halo proposta ba administradores munisipius hato’o ba ministeriu estatal hodi aloka orsamentu,” Deputadu Noe hateten.
Tanba kondisaun sede ladiak no kontrolu husi governu ladun masimu, entaun nia dehan, iha sukus balun kuaze tinan ida tomak laiha atividades no komunidade rasik lahatene programa sukus nian.
Vise Ministru Administrasaun Estatal, Tomas do Rosario Cabral, hateten ministeriu iha duni planu atu hadia sede sukus,maibe orsamentu laiha.
“Osan laiha, tanba envelope fiscal ne’ebe refere ba ministeriu estatal ne’e $35 mil deit,” Vise Cabral hatan.
Nia hatutan, orsamentu Programa Nasional Dezemvolvementu Suku (PNDS) mos la fo dalan atu halo manutensaun ba sede suku hirak ne’e, tanba programa orsamentu ne’e halai liu ba infra-estruturas baziku.
Maibe, nia dehan, programa manutensaun ba sede suku sira ne’e, bele realize iha tinan 2017 liu husi Programa Dezenvolvementu Distrital (PDD).
“Manutensaun ne’e so bele liu husi PDD, maibe sei iha tinan 2017,” nia hateten.
