Koordenadora Edukasaun Fundasaun Alola (FA), Sofia Camões Pereira, hateten sira estabelese ona sentru pre-eskolar alternativu hamutuk 204 iha munisipio Viqueque no Ermera.
Nia dehan, ida ne’e ho objetivu atu fo oportunidade ba labarik sira iha area rural asesu ba edukasaun infantile ou edukasaun sedu, tanba numeru edukasaun infantile iha area rural minimu.
“Fo oportunidade ba labarik sira idade (3-5) iha area remotas sente mos edukasaun infantil, tanba maioria prezensa pre-eskolar iha nivel munisipio, labarik iha area rural la asesu,” Koordenadora Pereira hateten, iha Mascarenhas, Dili.
Nia hatutan, total sentru pre-escolar hamutuk 204, kompostu husi 102 iha munisipio Viqueque iha postu administrative Uato-Lari no Ossu, enkuantu 102 iha munisipio Ermera iha postu administrativu Railaco, Atsabe no Lete foho.
“Ami distribui ona livrus istoria no material aprendizajen balun no prosesu aprendizajen la’o tiha ona hahu fulan ne’e,” nia hateten.
Nia hatutan, labarik sira ne’ebe tama iha pre-eskolar ne’e sei la hetan sertifikadu, tanba ida ne’e hanesan edukasaun non formal ida atu fo konese deit labarik sira kona ba edukasaun inisio.
Nia dehan, fasilitadores ba sentru ne’e mak voluntario (komunidade) sira ne’ebe hetan ona formasaun iha sentru treinamentu profesores Fundasaun Alola nian.
Programa pilotu ida ne’e hetan apoiu finanseirus husi agensia international UNICEF ne’ebe implementa husi Fundasaun Alola servisu hamutuk ho organizasaun Kolega da Paz iha munisipio Viqueque no Institutu Mata Dalan Integradu iha munisipio Ermera.
Iha parte seluk, Diretor Edukasaun munisipio Viqueque, Emilio Amaral, hateten sira iha konesementu ba programa ne’e, tanba ekipa Fundasaun Alola halo ona koordenasaun ho edukasaun nivel national no munisipal antes implementa.
“Programa ne’e la’o ona iha munisipio Viqueque iha postu administrative Uato-lari no Ossu,” hateten Diretur Amaral.
Tuir nia, programa ne’e positive tebes tanba fo oportunidade ba labarik sira iha area rural asesu ba edukasaun inisiu, tanba pre-eskolar seidauk kobre area hotu iha munisipio laran.
