Xefe Divizaun ba Apoiu Plenaria (Diplen), Armando Machado, hateten iha tinan 2015 Membrus Parlamentu Nasional konsege produs lei foun 10.
Lei sanulu (10) ne’e, nia hateten, balun proprosta de lei mai husi governu no seluk projetu de lei ne’ebe inisativa husi deputadu sira.
“Durante tinan ida hahu husi Setembru 2014 to’o setembru 2015 konsege produs lei foun 10,” Xefe Machado hateten, iha Parlamentu Nasional.
Nia esplika, lei sira ne’ebe mak mai husi insiativa governu, mak kona ba alterasaun Lei Orsamentu Jeral 2014 inklui Lei Orsamentu 2015, no Orsamentu Ratifikativu 2015, Lei Resensiamentu Jeral e Abitasaun Populasuan, Lei Partidus Politiku, Lei Orgaun ba Administrasaun Eleitoral, Lei Divisaun Administrative do Teritoriu, Lei Lideransa Komunitaria no Lei Orsamentu Jeral do Estadu 2016 nian.
Nia hatutan, lei ne’ebe mai husi inisiativa deputadu sira, mak Lei Protesaun ba Konsumidores no Rejime Juridiku da Advokasia Privadu e Formasaun de Advogadus.
Alende ne’e, nia hateten, membrus Parlamentu Nasional mos konsege ratifika konvensaun lubuk ida husi UNESCO inklui ratifika akordu kooperasaun ho nasaun estrangeirus balun.
Nia hatutan, parlamentu konsege ratifika konvensaun UNESCO kona ba Protesaun Patrimoniu Mundial, Kultura e Natural inklui Diversidade das Espresoens kulturais, no ratifika konvensaun kona ba salva guarda patrimoniu cultural, nune’e mos aprova akordu de kooperasaun entre Republika Portugal, no aprova konkordata entre Timor ho Vatikanu.
“Sira konsege aprova mos kooperasaun kona ba bebas visa diplomatiku ho Uniaun Europeia,” nia hateten.
Iha parte seluk Deputadu Adriano Joao, rekonese katak Parlamentu Nasional konsege produs duni lei hirak ne’e iha tinan ida ne’e nia laran, no iha tinan ida ne’e mos sei aprova tan lei importante seluk ne’ebe mak agora dadaun prepara hela.
“Hanesan lei rai, lei anti korupsaun no lei pensaun vitalisia no seluk tan,” Deputadu Joao hateten.
Iha parte seluk komunidade Mario Gonsalves, hateten, lei hirak ne’ebe mak PN aprova ne’e seidauk bele koresponde ba ejizensia povu nian durante ne’e, tanba lakonsege halo revizaun ba lei pensaun vitalisia no lei anti korupsaun.
“Lolos lei hirak ne’e mak importante liu ba komunidade agora, maibe durante tinan hirak ona nunka diskuti lei ne’e,” nia hateten.
