Durante vizita ofisial foin lalais (26/01)ba Timor-Leste, Prezidente Republika Indonezia Joko Widodo hateten governu Indonezia iha ona komitmentu bo’ot no pronto atu ajuda Timor-Leste iha setor balun importante: setor infra estruturas, komunikasaun e transporte, saude inklui mos bisnis downstream.
Prezident Widodo haktuir tan katak Indonezia ho Timor-Leste kontinua haforsa liu tan kooperasaun servisu hodi dezenvolve diak liu tan setor bisnis downstream inklui esplorasaun eletrisidade, oleo no gas (LNG), iha parte infra-estruturas iha rai laran, e desde tinan 2011 to’o 2015 Indonezia liu husi sira nia impreza publiku konsege investe ona iha area infra-estruturasiha Timor hamutuk $344 miloens.
“No ihatinan 2016 ne’e espera katak sei haforsa liu tan kooperasaun hodi atinji triliun hitu rupiah,” Prezidente Widodo hateten, iha nia vizita ofisial loron ida iha Timor-Leste.
Entretantu iha setor saude nia hateten katak Indonezia pronto sai parseiru importante hodi fasilita aimoruk no fasilidade saude nian ne’ebe mak Ministeriu Saude presiza.
“Indonezia pronto atu sai parseiru prinsipal hodi prepara aimoruk no ekipamentus medikus nian iha Timor-Leste,” Prezidente Widodo hatete tan.
Kona ba komunikasaun no transportes, Prezidente hatete mos katak Indonezia kontinua hametin liu tan konektividades operador telekomunikasaun (Telkomsel) ne’ebe mak halo ona operasaun durante tinan tolu iha Timor-Leste; nune’e mos haforsa liu tan servisu Banku Mandiri ne’ebe harii ihaTimor-Leste desdetinan 2003; no inklui ajuda Timor-Leste planu atu harii aeroportu nasional no fo formasaun kona ba pilotu no grupu aviasaun nian.
Iha nia vizita ofisial loron ida ne’e, governantes nain rua Prezidente Joko Widodo no Primeiru Ministru Dr Rui Maria de Araujo halao mos enkontru hodi koalia mos kona ba problemas fronteiras, inklui asina MoU ho Sekretaria Estadu Joventude e Desportu(SEJD), Ministeriu Agrikultura e Pescas, Ministeriu Obras Publik, Transporte e Komunikasaun, no ho Ministeriu Petroleu e Rekursu Naturais.
Iha parte seluk Primeriu-Ministru Dr Rui Maria de Araujo hateten katak vizita xefe estadu Indonezia nian ne’e atu hametin liu tan relasaun bilateral entre nasaun rua ne’e no saida mak sira atu halo iha rai laran sei iha nia diak ba dezenvolvementu Timor-Leste nian.
Tuir Primeiru-Ministru, dezenvolvementu ekonomia iha Indonezia nian diak tebes, ne’e duni bele ajuda Timor atu oinsa bele dezenvolve ekonomia iha rai laran.
“Predisaun ne’ebe fo sai iha mundial, katak Indonezia nudar nasaun ne’ebe mak nia dezenvolvementu ekonomia diak tebes hanesan China no Estadus Unidus da Amerika,” Primeiru-Ministru Araujo hateten.
