Chief of Party USAID Contractor, Nicholas Richards, hateten programa agrikultura avansadu ne’ebe inplementa ona iha munisipiu Aileu, Ainaro, Bobonaro, Ermera no Dili ajuda ona komunidades ba redusaun kazu malnutrisaun iha rai laran.
Nia dehan, bazea ba standar nutrisaun mundial nian hatudu, katak iha Timor-Leste labarik no feto sira barak mak seidauk asesu ba hahan ho nutrisaun diak.
“Ami nia projetu ne’e hakarak hadia produsaun agrikultura, atu nune’e bele hasa’e produsaun no hadia nutrisaun komunidade nian,” Xefe Richards hateten, iha Dili.
Nia rekonese mos, katak maske la halakon totalmente problema malnutrisaun iha rai laran, maibe pelu menus ajuda hamenus oituan.
“Sekuandu projetu ne’e susesu iha munisipiu lima ne’e, ami espera katak ema seluk mos bele banati tuir sistema ne’ebe iha,” nia esperansa.
Alende ne’e, nia dehan, liu husi projetu ne’e mos sei desimina informasaun ba agrikultores kona ba oinsa mak bele kuda no tein hahan ne’ebe iha nutrisaun diak ba feto no labarik nia saude.
Iha parte seluk Vise Prezidente Parlamentu Nasional, Deputadu Aderito Hugo, hateten projetu ne’e nia papel importante, liu-liu atu diversifika produtu agrikultura Timor nian hodi aumenta nutrisaun.
“Hadia kualidade hahan ne’ebe mak povu sira konsume hodi kontribui ba nutrisaun, liu-liu ba labarik no inan sira,” Hugo hateten.
Tanba ne’e, nia mos sujere ba USAID Projetu Agrikultura Avansadu kolobora ho Ministeriu Agrikultura atu nune’e wainhira tempu projetu ne’e determinadu governu bele garantia nia kontinuidade.
