Membru Parlamentu (MP) Nasional, Deputada Josefa Alvares Soares, sente preokupadu ho operador ilegal ne’ebe halo desligasaun (pengalihan) ba numeru Timor-Leste (TL) nian bainhira halo kontaktu ba Indonezia.
Nia dehan, bainhira nia parte halo kontaktu ba Bali, Indonezia uja numeru Timor Telecom (TT) nian, maibe mosu iha ne’eba numeru seluk fali.
“Ida ne’e akontese mai hau dala rua ona, wainhira hau telephone ba Bali, hau uja nomor Timor Telekom nian, maibe la sai numeru Timor Telekom ninian no sai fali nomor seluk ida,” Deputada Soares kestiona, iha Parlamentu Nasional.
Lolos kestaun hirak ne’e labele akontese, tanba tuir nia, iha tinan 2011 Parlamentu Nasional halo ona liberalizasaun telekomunikasaun, kria autoridade reguladora ida hodi jere no superviziona no rezolve situasaun sira ne’e.
Nia esplika liu tan, iha dekretu lei regulamentasaun ba setor telekomunikasaun, artigu 19 alinea 4, hateten wainhira operador balun viola operador seluk ninia numeru ba interese privadu, autoridade reguladora iha direitu atu lori operador ilegal ne’e ba tribunal.
“Autoridade regulador sira mak seiduak haree buat ne’e ho didiak,” Deputada Soares hateten.
Hatan ba kestaun ne’e Vise Ministru Obras Publik Transporte e Komunikasaun (MOPTK), Inacio Moreira, rekonese kestaun ne’e e governu esforsu hela atu rezolve.
Nia dehan, MOPTK sei informa ba iha autoridade regulador Indonezia nian hodi koopera ho autoridade regulador Timor nian hodi rezolve kestaun ne’e.
“Ami buka nafatin dalan oinsa mak bele regularize, ita presiza prepara aparelu balun, nune’e karik ema atu halo pengalihan ita bele detekta,” Vise Morreira hateten.
Nia dehan, ema balun uja estrategia sira hanesan ne’e ho intensaun atu halo negosiu foer no ida ne’e akontese deit iha rai Indonezia, rai balun hanesan Singapur, Portugal no nasaun sira iha Europa nian laiha.
