Tribunal Munisipiu Dili (TMD) halo julgamentu ba kazu Violensia Domestika ne’ebe involve arguido JS (la’en) baku no tuku lezada CC (fen) tanba tolok, maibe parte rua deside hodi dame malu iha tribunal.
Tuir akuzasaun Ministeriu Publiku ne’ebe lee sai husi juis prezident, katak iha 02 Novembru 2010, tuku 4 :00 lokraik, laiha razaun ne’ebe sertu arguido tuur iha branda oin, murmura lezada, tanba la simu lezada tolok arguido no nia inan aman (banin).
Tolok primeiru, arguido seidauk iha reasaun, maibe lezada nafatin provoka hodi tolok tan dala ida, nune’e arguido sente nervozu ona, arguido hamrik tama ba uma laran hodi basa, tuku, no dada lezada nia fuuk to’o sabraut.
Tanba sente, katak aktu ne’ebe arguido halo ne’e kategoria violensia domestika, entaun lezada ho nia alin feto hato’o keixa iha polisia.
Hafoin lee sai akuzasaun hirak ne’e, juis prezident husu ba arguido atu hili koalia ou nonok, maibe arguido hili atu nonok hodi prova katak akuzasaun ministeriu publiku ne’e los hotu.
Iha fatin hanesan juis prezident husu ba lezada atu hili koalia ou nonok, maibe lezada hili koalia hodi dehan ba tribunal, katak agora dadaun lezada ho arguido diak malu ona no hela iha uma ida.
“Ami diak malu ona no deste kazu ne’e, nia nunka halo tan mai hau,” lezada CC deklara iha Tribunal Munisipal Dili.
Alende ne’e, nia mos rekonese, katak ekonomikamente nia ho oan sira depende ba arguido ne’ebe servisu nudar taxista.
Enkuantu Ministeriu Publiku akuza arguido komete krimi violensia domestika, tanba ne’e tenke hetan sansaun ruma.
Mesmu nune’e, tanba sakramentu matrimonio, sira nain rua deside atu dame malu iha tribunal nia oin, hodi jura kria uma kain ne’ebe nakonu ho domin.
