Ministru Obras Publiku, Transporte e Komunikasaun (MOPTK), Gastao Sousa, hateten governu hahu konstrui estrada diresaun munisipiu Dili ba Ainaro hahu konstrui no agora dadaun servisu la’o hela.
Ministru Sousa, hateten rehabilitasaun estrada husi Dili ba Laulara 10 kilometrus (km) no Solorema ba Ainaro uza osan imprestimu husi Banku Mundial (BM), enkuantu husi Laulara ba Solorema la uza osan imprestimu.
“Laulara ba Solorema agora dadaun obra la’o dadaun,” Ministru Souza hateten.
Maibe, nia dehan, estrada balun seiduak halo rehabilitasaun tanba sei atraza iha prosesu kompensasaun (selu komunidade nia aihoris (kafe) ne’ebe kona obra ne’e.
“Iha parte Lote Sinku sei atraza hela,” Ministru ne’e hateten.
Nia hateten, obra ida ne’e kompania internasional Cina Sondom Internasional (CSI) mak kaer.
Iha parte seluk Membru Parlamentu Nasional, Deputadu Antonio Ximenes Serpa, apoia atu governu halo estrada diresaun Dili-Ainaro, tanba estrada parte ne’e grave tebes.
Maibe, nia husu ba governu atu kontrola obra ne’e nune’e kompania bele halo ho kualidade diak.
“Se la’e halo tuir sira nia hakarak, e rezultadu estrada ne’e la to’o tinan aat fali ona,” Deputadu Serpa hateten.
