Komandante Polisia Transito Nasional, Inspektor Xefe Antonio L.C. Soares, hateten durante hala’o operasaun ba motor no kareta sira ne’ebe viola lei transito, iha mos membru polisia balun iha laran.
Nia dehan, husi total motor 17 ne’ebe konsege prende durante operasaun, iha mos membru polisia nian balun.
“Balun laiha xapa matrikula, dokumentus liu prazu no balun dokumentus la lori,” Komandante Soares hateten, iha Kaikoli, Dili.
Nia hatutan, ba membru polisia ne’ebe mak la kumpri regras transito nian, sira sei hetan kastigu dala rua, primeiru sira ba selu koima ba Diresaun Nasional Transporte e Terestre (DNTT) no segundu sira sei hetan sansaun disiplinar.
“Alende sira selu infalasaun tuir kodigu estrada, sira mos sei ba hatan iha departamentu justisa kona ba sansaun disiplinar,” Komandante Soares esplika.
Nia hateten, infalator (pelanggar) ne’ebe mak laiha xapa matrikula, ne’e viola Diploma Ministerial No 5/2010, artigu 112 no 8.9, kuandu dokumentus liu prazu ne’e viola artigu 124 no 5.
“Lei hirak ne’e mak presiza infalator sira tenke hatene,” Komandante ne’e hateten.
Iha parte seluk Membru Komisaun B (seguransa, defeza, negosiu estrangeiru), Deputadu Cesar Valente, hateten ne’e hatudu katak polisia transito implementa duni lei ho honestu, no implementa ba sidadaun hotu-hotu.
“Sira implementa duni lei ne’e iha sira nia instituisaun laran no mos ba povu,” Deputadu Valente hateten.
Maibe nia dehan, kazu sira ne’ebe mak membru polisia balun infrenta ne’e konserteza hanesan dokumentus liu prazu sira, tanba atu ba trata tempu mak laiha.
Enkuantu komunidade Vasco Fernandes, hateten ne’e nudar pontu edukasaun ida ne’ebe mak polisia hatudu ba povu katak lei ne’e favorese ba sidadaun hotu.
“La’os tanba nia membru polisia, entaun sira la kona tilang, la’e,” Fernandes hateten.
