Prezidente Defensor Publiku (DP), Sergio Hornai, hateten Defensor Publiku nain 10 mak prontu ona desloka sira ba iha tribunal munisipiu tolu (Baucau, Suai no Dili) hodi fo asistensia legal ba komunidades iha munisipiu tolu ne’e.
Hornai hateten, durante tinan ida sira simu teoria deit iha Sentru Formasaun Judisiariu (SFJ), e agora tama ba faze pratika nian.
“Hasa’e liu tan sira nia esperiensia iha pratika, bele abitua no hatene realidade servisu ne’ebe mak iha,” Prezidente DP, Hornai hateten iha Kaikoli, Dili.
Nia hatutan, agora dadaun sira esforsu atu aumenta nafatin rekursu humanus iha DP nian, nune’e bele fo asistensia legal ne’ebe efetivu liu tan ba iha komunidade sira.
Iha fatin hanesan DP estajiariu, Estaqui Guterres, hateten nia prontu atu tun terenu hodi halo estajiu iha fatin ne’ebe sira servisu ba.
“Ami prontu atu ezerse ami nia funsaun hanesan defensor publiku fo asistensia ba sidadaun hotu, liu-liu ba sira kbi’it laek sira,” nia dehan.
Entretantu Deputadu Antonio Serpa, konsidera ne’e progresu ida no politika Ministeriu Justisa atu hadia instituisaun DP ho diak liu tan iha futuru.
“Atu instituisaun ne’e bele la’o ho diak, presiza mos rekursu humanus,” nia dehan.
