Durante tinan 2014, Eletrisidade Demokratika Timor-Leste (EDTL) konsege hatama reseitas ahi nian hamutuk $17,532,62.19 ba kofre estadu nian.
Ministru Obras Publiku (MOP), Gastao de Sousa, hateten iha tinan 2012 konsege rekolha $53 mil deit kompara ho reseitas iha 2014 nian ne’ebe mak sa’e maka’as.
“Ne’e hanesan esforsu ne’ebe mak ami halo no ne’e hanesan progresu ida,” Ministru Sousa hateten, iha Parlamentu Nasional.
Maske nia dehan, komunidade balun sei halo ligasaun ilegal, maibe nia numeru oituan ona no maioria mak sosa ona pulsa ahi nian. “Komunidades komesa kolabora ho governu hodi la dada ahi ho ilegal,” nia dehan.
Enkuantu Membru Komisaun E (infra-estrutura, telekomunikasaun e transportes), Deputadu Inacio Moreira, hateten ne’e hanesan progresu diak ne’ebe setor eletrisidade atinji.
“Investimentu ne’ebe diak iha setor eletrisidade,” Deputadu Moreira hateten.
Mesmu atinji ona progresu iha tinan 2014, maibe nia dehan, la signifika servisu para ona, maibe husu nafatin ba governu, hodi bele esforsu kombate komunidade nebe halo aktividade uja ahi illegal.
“Nune’e kada tinan reseitas ne’e aumenta, la’os kada tinan tun fali,” nia dehan.
Nia mos hatutan, ba komunidade sira ne’ebe hela iha area remotas nebe eletrisidade tama ona maibe parte EDTL seidauk halo kobransa, “ Ne’e tenke kobra mak diak, nune’e balansu,” nia sujere.
