Prezidente Grupo Feto Parlamentar, Deputada Josefa Alvares Pereira Soares, hateten komunidade iha area remotas, liu –liu feto sira seiduk iha konesementu kona ba Lei Kontra Violensia Domestika (LKVD).
Nia hateten, ida ne’e akontese tanba sosializasaun ne’ebe husi Sekretariadu Estadu ba Promosaun Igualdade ba komunidades seidauk masimu.
“Ami la’o lemo-lemo ema barak mak seidauk komprende kona ba lei ne’e, entaun sira vitima mos nonok deit tanba laiha informasaun,” Deputada Soares hateten, iha Parlamentu Nasional.
Pior liu tan, nia dehan, lideransa komunitario balun mos seidauk komprende diak lei kontra violensia domestika ne’e rasik.
Alen de ne’e, nia hatutan, pontu focal sira ne’ebe SEPI destaka iha distritus la halo sosializasaun, hein bo’ot sira husi nasional tun foin sira mos akompanha.
Hatan ba kestaun ida ne’e, Sekretaria Estado ba Promosaun Igualdade (SEPI), Idelta Maria Rodrigues, rekonese kestaun ne’e maibe organizasaun non governmental sira ne’ebe hetan fundus husi SEPI mos halo sosializasaun.
“Ami fo apoiu osan ba grupo sira hamutuk 23 atu halo sosializasaun ba lei kontra violensia domestika no ami halo sosializasaun no formasaun ba lideransa suku sira,” SE Rodrigues hateten.
