Membru Parlamentu Nasional kestiona Konselho Ministru sosa kareta ba implementasaun projeitu ZEESM ho single sourse.
Deputadu Aderito Hugo hateten Ezekusaun orsamentu ba projeitu ZEEMS ninian mayoria azudikasaun dereta ou single sourse, hanesan sosa kareta prado rua ne’ebe ho montante orsamentu 71 mill ital.
“Hau lahatene uja dalan legal ida ne’ebe, karik iha ZEEMS ne’e iha nia lei internu ruma hanesan lei aprovizionamentu especial nian, ga oinsa?,” dehan Deputadu Hogo iha plenaria, foin lalais.
Tanba ne’e nia husu ba Konselho Ministru tenke justifika ba parlamentu nasional konaba asuntu ne’e, tuir lolos orsamentu ho total $ 5 mill to’o $ 71 mill ne’e tenke liu husi tenderizasaun.
“Hau husu ida ne’e tanba ezekusaun orsamentu ba ZEEMS ne’e sae makaas,” Deputadu Hugo hateten.
Hatan ba Preokupasaun ne’e Director Jeral Konselho Ministru Vitor Maia, rekunhese Konselho Ministru sosa duni kareta rua ho tipu prado ho maneira single sourse no kareta hirak ne’e intrega ba eskoltu Presidente ba projeitu ZEESM.
Nia informa antes sosa kareta ne’e president ZEESM mai halo justifikasaun iha konselho ministru katak kareta ne’ebe nia (Presidente ZEESM) eskoltu uja ho kondisaun a’at, no foin lalais akuntese dezastre hodi rejulta kareta pickup ida tan inutilizadu.
Tanba ne’e nia dehan ho razaun hirak ne’e maka konselho ministru deside atu hola lalais kareta rua ne’e hodi president bele uja ba implementasaun projeitu ZEESM ne’e.
“Nune’e ami halo duni prado rua ho single sourse hodi fo ba seguransa pessoal Dr Mari’i Alkatiri nian,” dehan Director Maia, foin lalais.
Nia hatutan iha duni kareta doasaun husi UNMIT nian ne’ebe atu intrega ba eskoltu Presidente ZEESM maibe kareta hirak ne’e kondisaun ladun diak.
