Grupo feto produsaun tais ejiji ba governu atu kria fatin ida hodi faan sira nia produtu, tanba durante ne’e sira hein governu organiza feira mak sira fa’an, kuandu laiha produtu sira ne’e rai to’o at.
Koordenadora Grupo Inan Terus Hadomi Feto, Adelina Freitas, hateten sira iha produtu barak maibe merkadu mak laiha, tanba governu seidauk kria fatin ida atu grupo feto sira ne’e bele tau sira nia podutu ba hodi fa’an.
“Ami hein governu no organizasaun feto sira telephone ami mak ami ba fa’an ami nia produtu hodi hetan netik osan oituan,” Freitas kestiona, ne’ebe partisipa iha feira Natal nian ne’ebe organiza husi Fundasaun Alola, iha Mascarenhas, Dili.
“Maibe feira laiha, ami la hetan osan tanba ami nia produtu sira ne’e rai deit iha uma, ema la sosa,”.
Kada tinan governu bele fo kapasitasaun ba grupo sira, maibe nia dehan, la kria fatin atu fa’an sira nia produtu ne’ebe grupo sira produs kapasitasaun sira ne’e laiha kontinuidade, tanba laiha rezultado ne’ebe bele kria sustentabilidade iha grupo laran.
Nia hatutan, produtu ne’ebe sira fa’an mak tais, asesoris, pasta, karteira, sapatu, sinelus suku ho tais, arte jenatu no seluk tan.
Entretantu, Sekretario Estado Industria e Kooperativa, Filipus Nino Pereira, rekonese merkadu sei sai problema bo’ot ba iha grupo industria ki’ik sira,no agradese ba organizasaun FA ne’ebe realiza feira dala rua iha tinan ida hodi fo oportunidade ba grupo inan feto sira atu fa’an sira nia produtu.
Nia hatutan, meus ne’ebe governu halo dadaun ne’e mak iha selebrasaun loron nasional ruma sempre organiza atividade feira atu fo merkadu ba grupo ki’ik sir abele fa’an sira nia produtu hodi hetan osan oituan.
“Ba futuru tenke iha sentru promosaun ba produtu Timor –Leste (hanesan galeria) ida para alende fa’an sira nia sasan, sira nia tividades mos bele konsentra iha fatin ida,” SE Nino dehan.
“Nune’e vizitante sira mai ita bele orienta ba fatin sira ne’e, maibe la’os tinan 2015,”.
Iha parte seluk, Diretora Ezekutivu Fundasaun Alola, Alzira Reis, hateten alende fornese merkadu ba grupo feto sira atu fa’an sira nia produtu liu husi feira ne’ebe iha, sira mos estabelese sentru Alola esperansa, atu grupo sira bele tau sira nia produtu hodi fa’an.
“Ami iha fatin Alola Esperansa atu sosa grupo feto sira nia produtu se laiha feira sir abele lori mai iha Alola esperansa sosa, maibe tenke iha kualidade atu komprador sira bele sosa,” Diretora Reis hateten.
Nia hatutan, produtu ne’ebe Alola esperansa sosa husi grupo feto sira mak tais no homan sira hanesan pasta no seluk tan.
