Ministerio Edukasaun hala’o revizaun ba iha kurikulum ensino baziku III siklu no dezenvolve metologia aprendizajen foun atu hanorin labarik sira, tanba metologia tuan ladun efetivu.
Vise Ministra Edukasaun Ensino Baziku, Dulce de Jesus Soares, hateten atu forma rekursu humanu ne’ebe kualidade no ho pensaun ne’ebe kritiku, tenke implementa duni metologia pratika liu –liu deskobre rasik buat ruma nune’e sira bele sai sidadaun ba future ne’ebe diak.
Nia haktuir, metodologia aprendizajen ne’ebe sentraliza ba labarik hanesan professores sira koalia alunus rona no haruka alunus sira dekor ne’e la tempu ona.
“Edukasaun ne’ebe oras ne’e ita atu halo mudansa iha TL mak edukasaun ida ne’ebe kria labarik sira sai pensador ne’ebe kritiku bele analiza no halo avaliasaun ba informasaun ne’ebe sira simu liga ba sira nia moris lor-loron,” Vise Ministra Soares hateten, hafoin lansa revizaun kurikulum, iha salaun Xanan Reading Room, Dili.
Alem de halo revizaun ba kurikulum, hadia mos livrus disiplina siensia fisiku naturais no matematika atu professores sira hanorin diak liu tan, nune’e alunus sira mos bele aprende diak liu tan.
Nia hatutan, sei iha mos formasaun ba professores sira kona ba implementasaun kurikulum foun ne’e rasik no metologia hanorin ne’ebe iha tanba atividade ne’e hetan apoiu fundus montante 2 miloens husi KOICA ba tinan 2014-2016.
“Husu ba professores sira ne’ebe iha ne’e hotu-hotu tenke uja metodu pratika ne’e obrigatorio,” nia dehan.
Iha parte seluk, reprejentante Korean Internasional Cooperation of Agency (KOICA) TL, Uidon Chung, prontu apoiu nafatin governu Timor-Leste hodi dezenvolve edukasaun ne’ebe kualidade ba Timor oan sira hotu.
Nia hatutan, KOICA sei servisu besik liu ho Ministerio Edukasaun no UNESCO atu asegura implementasaun kurikulu ne’e rasik ba ensino III siklu, liu –liu ba disiplina sensia no matematika ba Timor oan sira tanba nasaun barak susesu iha metodologia ida ne’e.
“Ami promote atu fahe ami nia esperiensia atu resolve dezafiu ne’ebe iha no dezenvolve edukasaun ne’ebe kualidade hodi hametin ekonomia ne’ebe sustentavel,” Chung hateten.
Entretantu Xefe Programa Edukasaun UNESCO Jakarta, Mee Young Choi, hateten sei esforsu buka fundus hodi apoiu governu Timor –Leste dezenvolve edukasaun ne’ebe kualidade.
“UNESCO sente kontente atu fo supporta governu Timor –Leste hodi asegura sidadaun Timor –Leste prepara an dadaun ona atu hasoru dezafius iha future,” nia dehan.
Iha oportunidade ne’e mos UNESCO Jakarta entrega ekipamentus pratika no almario ba ministerio edukasaun atu distribui ba iha 202 ensino baziku sentrais hodi uza ba pratika nian.
