Sentru Voluntario Aconcelhamentu Teste Segredu (VCCT) Polisia Nasional Timor–Leste la funsiona durante tinan ida nia laran tanba falta rekursu humanu.
Responsavel Klinika PNTL, Inspiktur Abilio De Araújo Gonsalves hateten oras ne’e dadaun sira halo ona aprosimasaun ba iha ministerio saude atu resolve problema administrasaun ne’ebe iha hodi reativa fali servisu sentru VCCT.
“Sim durante ne’e ami la funsiona maibe agora ami kordena ona ho sira komisaun nasional kombate HIV/SIDA no ministerio saude atu reve fila fali sistema administrasaun ne’ebe iha hodi funsiona fila fali,” dehan Inspiktur Gonsalves iha knar fatin Kaikoli, Dili.
Nia haktuir durante sentru la funsiona sira servisu hamutuk ho ministeriu saude atu atende ba membru sira ne’ebe hakarak konfirma sira nia estatus HIV iha fasilidade sira ne’ebe ministerio prepara ona.
Nia hatutan iha tempu badak sei funsiona fila fali tanba ekipamentus kompletu ona hein tan membru PNTL ida ne’ebe hasai lisensiatura iha Kediri Indonesia kona ba tekniku laboratorium atu funsiona fali atende membru PNTL sira. Alende ekipamentus medikus no rekursu humanu ne’ebe sufsente sentru ne’e mos hetan apoiu Ambulansia ida husi Komandu jeral hodi fo atendimentu movel iha distritus mos.
Iha parte seluk Xefe Unidade HIV/SIDA ministerio saude, Marta Abenia hateten ministerio saude prontu atu apoiu ekipa sentru ne’e hodi re-funsiona fila fali sentru ne’e intermus fo kapasitasaun ba membru sira kona ba tratamentu HIV/SIDA, konseling ne’ebe diak tuir padraun ministerio nian.
Nia hatutan ministerio saude mos apoiu ona instituisaun F-FDTL hodi estabelese sentru VCCT iha F-FDTL nian hodi fo atendimentu ba membru F-FDTL tanba instituisaun rua ne’e nudar lutu ba nasaun importante tebes atu kontrola sira nia saude.
“Ministerio saude prontu atu fo treinamentu ba membru VCCT sira atu sira bele fo konseling no enkorja membru PNTL sira halo teste hodi konfirma sira nia status ba HIV no bainhira indentifika sira prontu ona fo tratamentu,”dehan Xefe Marta.
Nia mos apresia ho desizaun lideransa F-FDTL ne’ebe fo sai ona komitmentu atu kada fulan tolu membru F-FDTL hotu tenke halo teste HIV hodi konfirma sira nia status livre husi virus.
Entertantu Komandante Jeral PNTL Longinhos Monteiro hateten iha tempu badak sei re funsiona fila fali sentru ne’e atu bele enkoraja membru sira halo teste HIV.
Nia mos fo sai ona instrusaun ida ba membru sira hotu atu obrigatoriumente halao teste HIV tinan ida dala ida ba membru tomak.
“Husu membru sira laos ona voluntario maibe obrigatorimente halo teste tinan ida dala ida atu ita bele hetan konfirmasaun ita livre husi virus HIV,” dehan Nia.
Sentru VCCT ne’e estabelese iha tinan 2011 ho objetivu atu iha fatin ne’ebe espesifiku ba membru PNTL sira halo teste HIV hodi konfirma sira nia status no bainhira indentifika sira bele hetan tratamentu kedas iha sentru ne’e.
