Diretor Klinika Bairo-Pite (KBP), Daniel Murphy, hateten klinika kontinua haruka pasiente sofre moras fuan ba halo operasaun iha liur, tanba Timor –Leste seidauk iha fasilidades no rekursu atu halo operasaun.
Nia haktuir, ho apoiu Rotary Club iha fulan Maio 2014, KBP konsege haruka tan pasiente ida ho naran Natalisto Vitor Freitas Jeronimo (6) ba iha Ospital Auckland New Zeland hodi halo operasaun ba fuan, tanba fuan ki’ik no kuak.
“Ami fo obrigadu ba Rotary Club no governu New Zeland, ho sira nia tulun agora nia (pasiente) bele isin diak,” Doutor Murphy hateten, iha servisu fatin Bairo-Pite, Dili.
Diretor Murphy ne’ebe konesidu ho doutor Dan, ne’e hateten bainhira sira identifika, katak pasiente sofre moras fuan presiza halo operasaun, KBP uja meus teknologia hodi buka apoiu husi ema seluk.
“Ami haruka ona ema nain 50 ba liur halo operasaun ba sira nia fuan, iha nain ida mak mate iha Sydney-Australia, tanba tratamentu tarde no restu diak hotu,” Doutor Dan informa.
Nia esplika, moras fuan afeta ba saude komunidade, tanba konsekuensia husi kiak, laiha higiene liu –liu bee moos, sanitasaun no impaktu mos husi vector (susuk) tata, entaun hetan moras ataka ba fuan.
Nia informa, dadaun ne’e iha pasiente nain ida (Natalisio Vitor Freitas Jeronimo) mak oras ne’e dadaun baixa hela iha klinika, nia komplikadu tebes no presiza kustu bo’ot hodi halo operasaun iha liur.
“Nia sofre moras ne’e durante tinan 11 ona hein hodi hetan apoiu atu halo operasaun iha liur,” doutor Dan hateten.
Iha parte seluk, pasiente Jeronimo nia aman, Manuel Freitas, fo agradese ba doutor Daniel no Rotary Club ne’ebe ajuda ona nia oan hodi halo operasaun iha New Zeland ho susesu.
“Hau hanesan aman, hau entrega tomak ba doutor, ami la hatene saida mak moras fuan, ami ba halo operasaun iha New Zeland ho susesu agora nia isin diak,” Freitas dehan.
Nia haktuir, sira halao tratamentu iha ospital Auckland durante fulan rua resin no oras ne’e dadaun kada semana halo kontrola iha klinika Bairo-Pite.
