Sekretariu Estadu Dezenvolvementu Local, Samuel Mendonça hateten feto nia partisipasaun iha implementasaun Programa Nasional Dezenvolvementu Sukus (PNDS) positive tebes, tanba atinji ona 53%.
Nia haktuir, iha politika abordagen jeneru, iha PNDS partisipasaun feto tenke 40%, maibe realidade rekrutamentu funsionario ho kargu responsabel no tekniku PNDS iha distritus ema nain 88 feto iha 53%.
Tanba ne’e nia dehan, labele konsidera feto labele halo buat ne’ebe mane deit mak bele halo. “Hanesan motor ne’ebe ami sosa ho modelu Kawasaki, hanoin sira labele lori, maibe alin feto sira bele lori motor bo’ot ba distritu,” SE Mendonça hateten, iha Parlamentu Nasional.
Nia hatutan, involvementu feto ho 53% ne’e balun kaer kargu foti desizaun hanesan responsabel no koordenador ba programa inklui mos tekniku.
Entretantu Koordenadora Programa Caucus feto iha politika, Paula Corte Real, husu ba reprezentante feto sira iha konselho sukus, atu partisipa ativu no foti desizaun mos ba projetu fisikus PNDS ne’ebe la’o iha sukus.
“Hadia duni komunidade nia moris liu –liu atu responde ba ejizensia feto sira iha area rural no hadia duni sira nia moris,” nia dehan.
Nia louva ba governu liu –liu Ministerio Administrasaun Estatal (MAE) ne’ebe konsidera mos partisipasaun feto iha programa importante sira iha sukus.
Iha parte seluk, Prezidente Grupu Feto Parlamentar Timor –Leste (GMPTL), Deputada Josefa Alvares Pereira Soares, kestiona partisipasaun feto iha PNDS, tanba lideransa sukus la involve reprezentante feto iha konselhu sukus iha foti desizaun.
“Presiza halo fiskalizasaun ida klean, nune’e labele iha diskriminasaun no ema hotu bele partisipa no fo desizaun ba asuntu ruma ne’ebe importante ba iha suku ne’e rasik, labele xefe sukus deit mak foti desizaun,” nia dehan.
Nia husu ba reprejentante feto sira iha sukus atu partisipa ativu iha programa sira ne’e hotu bele benefisia mos ba feto maluk sira hotu ne’ebe iha sukus laran.
