Membru Parlamentu Nasional rekomenda ba governu atu fo importansia ba asuntu labarik nian, liu-liu problema trabalhu infantile ne’ebe buras iha rai laran, liu-liu iha capital Dili.
Iha selebrasaun loron mundial labarik ne’ebe monu iha dia 01 Junu kada tinan, Deputadu Eladio Faculto, husu ba ema hotu atu halo reflesaun ba servisu ne’ebe la’o ona hodi promove labarik sira nia direitu, presiza hametin liu tan.
Nia hateten, uluk iha tinan 1975, labarik sira barak sofre tanba luta ba libertasaun , maibe ohin ukun tiha ona, governu tenke trata sira ho dignu no justu, atu sira bele goza sira nia direitu.
“Importante tebes atu hasai sira husi kondisaun hotu-hotu, liu –liu labarik sira ne’ebe servisu iha dalan ninin, servisu obrigatoriu, la hetan oportunidade ba eskola inklui mos labarik sira ne’ebe sai vitima ba violasaun seksual no insestu, sira tenke hetan tratamentu ne’ebe dignu no justu iha sosiedade,” Deputadu Faculto hateten, iha Plenaria Parlamentu Nasional.
Tuir nia, to’o ohin loron labarik sira seidauk goza sira nia direitu 100% iha parte hotu, hanesan asesu ba edukasaun ne’ebe kualidade, labarik barak sei tuur iha rai, la’o ho distansia dook, laiha saneamentu baziku, livru no seluk tan inklui mos asesu ba saude.
Iha parte seluk, estudante Aida Soares, husu ba Ministeriu Edukasaun atu sosializa informasaun ne’ebe klean ba sira kona ba politika Zero Toleransia iha eskola atu sira bele iha konesementu.
“Tanba durante ne’e violensia iha eskola kontinua akontese,” estudante ho idade tinan 15 ne’e sujere.
Entretantu Diretor Jeral Sekretariu Estadu Politika Formasaun Profesional e Empregu (SEPFOPE), Jacinto Barros Gusmão, hateten SEPFOPE halo ona esforsu balun atu kombate trabalho infantil no forsadu iha Timor –Leste.
Iha fulan hirak liu ba, nia dehan, Konselho Ministru aprova ona dekretu lei ida hodi regula trabalho infantil no estabelese ona Komisaun Nasional Kontra Trabalho Infantil no sei halo survey atu bele iha statistika kona ba trabalho infantil iha Timor –Leste.
“Tinan ne’e SEPFOPE halo hela formasaun ba inspektur sira, espesifiku atu haree trabalho infantil no servisu forsadu nian ba labarik, sira nia idade atu eskola no halimar, la’os servisu,” Gusmão hateten.
Nia hatutan, iha dekretu lei ne’e regula servisu komisaun nasional kontra trabalho infantil nian, regula mos sansaun administrasaun ba kompania no individu inklui inan aman sira ne’ebe fo servisu ba labarik sira. “La’os pena prizaun.”
