Kompania Internasional ne’ebe hamahon an iha Sunrise Joint Venture (SJV) apoia $46,000 resin ba organizasaun Fundasaun Alola, hodi implementa programa Suku Hadomi Inan Ho Oan (SHIO) iha distritu Aileu no Ainaro.
Diretora Ezekutivu Fundasaun Alola (FA), Alzira Reis, hateten programa SHIO ne’e hahu iha 2003, ho intensaun atu habelar informasaun kona ba importansia saude inan ho oan iha sosiedade nia le’et.
“Problemasaude inan ho oan la’os deit responsabilidade inan ou ema ida nian, maibe ne’e problema social, ema hotu tenke fo importansia,” Diretora Reis hateten, iha Timor Plaza, Dili.
Aleinde ne’e nia dehan, fo mos apoia ba Servisu Integradu Saude Komunitaria (SISCA) nian iha sukus, fo atendimentu ba komunidade sira tanba numeru mortalidade as impaktu mos fasilidade saude limitadu, menus pesoal no transportes.
Nia hatutan, sira mos monta ekipa iha fasilidade saude sira hanesan Ospital Referral Baucau, Oe-Cusse, no Ospital Nasional Guido Valadares, habelar informasaun kona ba importansia susu been inan nian ba bebe no komplementar aihan ne’ebe diak ba bebe nia saude.
Nia hateten, desde 2003 to’o tinan 2012, FA konsege estabelese ona rede servisu SHIO nian iha sukus 120, iha distritu 11 no iha tinan ida ne’e ho apoiu SJV sei implementa tan iha sukus hat iha distritu Aileu ho Ermera.
Iha parte seluk, Diretor Nasional Saude Komunitaria Ministerio Saude, Carlito Soares, fo agradese SJV ne’ebe apoia ona organizasaun FA, ajuda Ministeriu Saude fo atendementu saude ba komunidades, liu-liu ba inan h oan sira.
“Asistensia saude ba komunidade ho kualidade no hakbi’it komunidade atu partisipa hodi prevene sira nia saude rasik,” nia hateten.
Nia rekonese, katak mortalidade no morbilidade inan ho oan sei as iha Timor –Leste, tanba ne’e ba futuru Ministerio Saude sei esforsu atu servisu besik liu tan ho parseirus dezenvolvimentu sira, koordenasaun no kolaborasaun ba aktividade kuidadus saude husi suku to’o nasional.
Nia hatutan, moras sira ne’ebe kontribui ba mortalidade no morbilidade inan ho oan as iha Timor –Leste durante ne’e mak moras diarea, malaria, TBC, ISPA, Pulmonia inklui mos malnutrisaun.
Iha fatin hanesan, reprezentante SJV-TL, Antonio Campus dos Santos, hateten Sunrise Joint Venture iha komitmentu nafatin atu apoiu governu Timor –Leste, iha area hanesan saude, edukasaun inklui fo kapasitasaun ba joventude iha area oi-oin.
“Ami SJV iha komitmentu bo’ot atu apoiu komunidade TL liu husi ami nia focus area iha tolu hanesan suade, edukasaun hasa’e kapasidade ida seluk halo relasaun ho komunidade,” nia hateten.
