Membru Parlamentu Nasional konsidera Sekretaria Estadu ba Promosaun Igualidade (SEPI) nia Gender Vocal Point iha distritus laiha, tanba laiha aktividades ida mak sira hala’o no hatudu rezultadu diak.
Tanba ne’e Deputadu Virgilio da Costa Hornai, konkorda bainhira feto potensial sira husi distritus kestiona kona ba prezensa gender vocal point iha distritus, tanba laiha aktividades.
“Ami membru parlamentu rasik la hatene servisu pontu vocal jeneru sira iha distritu, pior liu la konese tan sira,” Deputadu Hornai hateten, iha salaun Maria Goreti SEPI, iha Kaikoli, Dili.
“Hau hanoin, ita presiza iha komunikasaun ida intensive atu fo hanoin ba malu hodi fortifika politika promosaun ba feto diak liu tan iha futuru,” Prezidente Komisaun F (saude, edukasaun, kultura, veteranus no igualdade jeneru) ne’e dehan.
Nia mos husu ba vocal point sira atu halo enkontru ho membru parlamentu sira, bainhira tun ba baze halo fiskalizasaun nune’e bele fahe informasaun ba malu relasiona ho promosaun igualidade iha nivel distritus.
Aliened ne’e nia mos kestiona kona ba implementasaun politika gender meanstreaming iha lina ministerial, presiza haforsa no hametin liu tan lina koordenasaun ne’ebe diak liu tan.
Entretantu Sekretaria Estado ba Promosaun Igualdade (SEPI), Idelta Maria Rodrigues, rekonese duni problema ida ne’e, no iha tinan ne’e SEPI sei fo formasaun kapasitasaun, fasilidades hodi suporta vocal point sira nia servisu iha baze.
“Ami rekonese, seidauk iha kondisaun ne’ebe diak ba pontu vocal sira atu hala’o servisu, sira sei tabele hela ba administrasaun distrital,” SE Rodrigues hateten.
Tanba ne’e, nia dehan, tinan ne’e sei fo motorizada, komputador no harii sentru jeneru iha distritu hodi fasilita servisu pontu vocal point sira iha nivel distritu, tanba fatin sai obstaklu ba sira atu hala’o aktividades ho feto pontensial distritus.
