Tinan ida ne’e (2014) Ospital Nasional Guido Valadares sei hapara transferensia pasiente moras rins ba estranjeirus, tanba ospital iha ona kondisaun no rekursu atu fo atendimentu ba pasiente moras rins. 
Doutor Aniceto Barreto, hateten pasiente sira ne’ebe oras ne’e dadaun iha estranjeirus, sei haruka fila no halo tratamentu iha ospital nasional.
Tanba nia dehan, oras ne’e dadaun ospital nasional iha ona makina fase ran hamutuk walu no apoiu mos husi medikus no enfermeirus estranjeirus inklui Timor oan balun atu halo operasaun ba makina ne’e hodi atende pasiente moras rins sira.
“Ba oin ita sei la haruka tan pasiente fase ran ba estranjeirus,”Doutor Aniceto Barreto hateten, iha nia servisu fatin Bidau Toko Baru, Dili.
Nia hatutan, oras ne’e dadaun pasiente hamutuk nian 16 mak halo hela tratamentu fase ran rutina iha HNGV no iha nian walu mak sei iha Indonesia maibe sei fila hotu iha tempu badak tanba makina walu ne’ebe iha ida sei destina ba pasiente ne’ebe ho infeksaun hanesan Hepatitis no seluk tan.
Iha parte seluk, Deputada, Ilda Maria da Conçeicão, konkorda atu hapara pasiente sira ne’ebe tuir medikus sira iha HNGV dehan bele halo tratamentu iha ne’e maibe buat importante ida mak presiza hare tratamentu sira iha rai laran.
Membru Komisaun F (saude, edukasaun, igualidade jeneru no veteranus) ne’e mos lamenta ho atitude pesoal saude sira ne’ebe dala ruma atende pasiente la ho pasensia no pior liu tan la atende.
“Problema mak ne’e dalaruma moras sira ba iha ne’ebe sira la atende halo familia sira preokupa,” Deputada ne’e dehan.
Nia haktuir, politika atu redus numeru transferensia moras ba rai liur ne’e diak maibe tenke hadia sistema tratamentu iha HNGV rasik liu –liu mentalidade ema nian atu atende pasiente sira.
