Ministeriu Publiku (MP) lori eis Deputadu Vidal de Jesus alias Riak Leman ba hatan iha tribunal, tanba uja kareta estadu (Parlamentu Nasional) ba tuir kampanha eleisaun parlamentar nian iha 2012.
Bazea ba akuzasuan husi Ministeriu Publiku ne’ebe lee sai husi juis singular, Antonio Helder do Carmo, katak iha loron 26 Junu 2012, arguido (Riak Leman) uja kareta Parlamentu Nasional (PN) ba Hera, suku Duyung atu halo kampanha Partidu Sosial Demokrata (PSD) nian.
Nune’e mos iha loron 30 Junu 2012, arguido kontinua uja kareta estadu ne’e ba halo kampanha iha kampu demokrasia, tanba ne’e MP akuza argudio ho krime pekulatu de ujus tuir kodigu penal Timor-Leste nian.
Maibe iha deklarasaun iha tribubnal, arguido hateten akuzasaun ne’e la loos hotu, momentu ne’eba nia ba duni Hera, suku Duyung la’os ba kampanha, maibe hasoru nia eleitor sira no kombustivel ne’ebe uja mos privadu nian.
“Iha tempu ne’eba hau nia naran mos laiha lista kandidatura, ne’ebe hau la ba halo kampanha iha momentu ne’eba,” arguido deklara iha Tribunal Distrital Dili.
Maske nune’e iha alegasaun ida ne’e MP husu ba tribunal atu aplika pena multa ba arguido, tanba aprovadu arguido uja fasilidade estadu ba partidu nian, ne’e fo prejuizu ba estadu.
Entretantu advogadu ba arguido husu ba tribunal atu absolve tiha arguido, tanba laiha testamunha ida mak deklara iha tribunal, katak arguido uja duni kareta PN ba tuir kampanha.
No iha momentu ne’eba, advogadu ne’ebe lakohi temi naran ne’e, dehan iha momentu ne’eba mos kareta sira ne’e tama ona iha kategoria lelan, nune’e manutenusaun no ense mina hasai deputadu sira nian osan rasik, la fo prejuizu ba estadu.
Hafoin rona tiha deklarasaun ne’e, Juis singular Antonio Helder do Carmo, deside absolve tiha kazu ne’e.
