Triste no ho matan been.Ida ne’e mak sentementu Sekretaria Estado ba Promosaun Igualidade (SEPI), Idelta Maria Rodrigues, bainhira vizita ba uma mahon sira iha Dili laran no hasoru malu ho labarik sira ne’ebe sai vitima husi violasaun seksual no insestu.
SE Idelta Maria Rodrigues, sente triste tanba labarik hirak ne’ebe hela iha uma mahon ne’e maioria ho idade 13 anos no uma mahon la’os sira nia fatin.
“Maibe kontradis, sira tenke hela iha uma mahon ho sira nia bebe ne’ebe kondisaun nutrisaun ladun diak. Hau sente triste tebes bainhira hasoru sira, lolos sira fila ba eskola,” SE Rodrigues informa bainhira hasoru malu ho Grupo Feto Parlamentar, iha salaun Maria Tapo, Kaikoli, Dili.
Sekretaria Estadu promote, katak sei apoia vitima sira ne’e atu hala’o atividade negosio ki’ik ruma hodi sustenta sira nia moris, liu husi organizasaun feto sira ne’ebe fo hela asistensia ba vitima sira.
Iha fatin hanesan, Deputada Aurora Ximenes, hateten kazu violasaun seksual ba minoridade inklui insestu ne’e problema seriu no estado tenke fo atensaun imediatamente, tanba liga ho moral.
Atual Sekretaria Grupo Feto Parlamentar (GMPTL) ne’e lamenta tebes ho deklarasaun suspeitu balun iha tribunal, katak kazu insestu akontese tanba hakarak malu.
“Ne’e la logika no imposivel oan hakarak halo seksual ho aman,” Deputada husi bankada Fretilin ne’e lamenta.
Aliened ne’e, nia mos lamenta tanba iha kodigu penal, laiha artigu ida mak sita kona ba insestu, maibe sita deit kona ba violasaun seksual ba minoridade, governu tenke iha atensaun espesifiku ba kazu insestu.
“Hau hanoin governu bele hare fila fali kodigu penal ne’e, tanba kestaun insestu ne’e problema seriu no tenke fo atensaun duni,” Deputada Ximenes sujere.
Entretantu, Deputada Albina Marçal Freitas, hateten labarik (vitimas) sira ne’e tenke hela iha uma mahon, tanba prosesu justisa formal la’o tarde no suspeitu sei livre hela.
Tanba ne’e nia husu ba SEPI no organizasoens feto sira atu servisu maka’as liu tan hodi kombate violensia hotu hasoru feto no labarik feto sira.
“Trasa politika reintregasaun vitima ba familia, integra vitima ba iha sosiedade hodi sira bele kontinua estudu,”nia sujere.
