Deputadu Eduardo Barreto konsidera Membru Parlamentu ne’ebe la partisipa iha seminariu internasional kona ba adezaun Timor-Leste ba ASEAN hatun imajen Parlamentu Nasional Timor nian iha mundu, tanba deputadu/a barak mak la tuir seminariu ne’e. 
Deputadu husi bankada Congresu Nasional Rekonstrusaun de Timor (CNRT), ne’e hateten lolos deputadu sira tenke partisipa iha seminariu ne’e, tanba espesialista husi internasional mak mai halo palestra kona ba Timor-Leste tama ba ASEAN, durante loron tolu iha Hotel Ramelau ne’e.
“Ita konvida ema peritus husi liur mak mai haree, ita nia imajen iha ne’ebe,” Deputadu Bareto lamenta, iha Parlamentu Nasional.
Nia preokupa, tanba seminariu ne’e lori parlamentu nian naran (Komisuan C mak organiza), maibe partisipasaun deputadu sira nian ba seminariu loron tolu ne’e hamutuk 14 to’o 15 deit.
“Hau hanoin meja Parlamentu tenke haree no eventu tuir fila fali mai husu partisipasaun deputadu sira nian, pelomenus maioria tenke marka prezensa,” nia hateten.
Nia hateten, partisipasaun deputadu nian ba seminariu ne’e importante tebes, tanba desizaun ikus parlamentu mak sei anunsia buat ruma kona ba Timor-Leste ba adezaun ASEAN nian.
“Ita tenke kompriende situasaun sira ne’e hotu, para bainira ita ba iha ne’eba ema labele hateke fali mai ita hanesan ita la hatene buat ida ne’e,” Deputadu Bareto dehan.
Entretantu membru Komisaun C (finansas publiku), Deputada Maria Fernanda Lay, hateten seminariu ne’e importante tebes oinsa mak fo formasaun ba deputadu sira kona ba Timor-Leste tama ba membru ASEAN.
“Ita tenke iha konesementu, tanba parlamentu mos foti desizaun, ita bele tama ga la’e?,” Deputada Lay hateten.
Nia dehan, Komisaun C mak organiza seminariu internasional ida ne’e, tanba koalia kona ba ekonomia no finansas nian.
Hatan ba preokupasaun ne’e Vise Prezidente Parlamentu Nasional, Deputadu Aderito Hugo, katak iha momentu ne’eba antes hala’o seminariu ne’e, meja parlamentu fo ona avizu ba deputadu/a hotu atu partisipa.
“Hau rasik mak anunsia iha meja ne’e ho mos liu husi konferensia lider bankada ninian atu husu deputadu sira nia partisipasaun importante ba seminariu internasional ne’e,” Hugo hateten.
