Koordenador Komisaun Nasional Peskiza no Elaborasaun Historia Mulher Timor –Leste (KNPEHTL), Nuno Rodrigues, hateten iha tempu badak sira sei publika livru papel feto iha Luta libertasaun. 
Nia hateten, prosesu hakerek livru ne’e atraza durante ne’e, tanba presiza tempu no orsamentu hodi hakerek kompleta livru ne’e.
Nia informa, dadaun ne’e tama ona iha prosesu editing inklui kompleta evidensia balun hanesan rezultado konferensia iha ai laran.
“Ami sei publika iha fulan Junu tinan ida ne’e tuir data deadline ne’ebe organizasaun Popular da Mulher Timor nudar nain husi projetu ne’e,” Koordenador Rodrigues hateten, iha Balide, Dili.
Nia hatutan, KNPHETL sei kontinua buka dokumentus balun ne’ebe presiza; liu husi intervista ho lider Falintil balun hodi hetan informasaun hanesan rezultado konferensia iha ailaran.
Prosesu tomak ba projetu hakerek livru ne’e , nia hateten, hahu kedas iha tinan 2010 to’o ohin loron seidauk remata, tanba defisil hetan evidensia liga ho prosesu luta Timor –Leste nian ba ukun rasik an.
Entretantu Sekretaria OPMT, Merita Alves, rekonese katak prosesu ne’e kleur duni, tanba atu hakerek livru istoria ida kompleta ho evidensia ne’e la hanesan ho hakerek livru novel nian.
OPMT hanesan primeiru organizasaun feto apresia no orgulho bo’ot, tanba prosesu tomak hetan apoia husi estado, governu no lideransa rezistensia sira, atu jerasaun foun sira hatene partisipasaun feto hahu husi luta to’o agora.
“OPMT iha responsabilidade moral atu hatutan ba jerasaun foun luta feto Timor ba iha libertasaun nasional,” nia hateten.
Maske livru ida ne’e sei la perfeitu hanesan ema hotu nia hakarak, maibe nia dehan, bele sai memoria diak ida ba jerasaun foun sira atu hatene istoria feto nia partisipasaun.
Iha parte seluk, joven Agostina Sarmento, hateten OPMT hanesan organizasaun feto Timor iha obrigasaun atu konta sai istoria kona ba partisipasaun feto iha prosesu tomak ba luta libertasaun liu husi kualker meius ba jerasaun foun sira.
“Hau hanoin livru ne’e interesante tebes atu lee no halo ita semakin penasaran, hakarak hatene feto nia partisipasaun ne’e hahu oinsa hodi kontribui ba luta libertasaun,” nia dehan.
