Membru Parlamentu Nasional preokupa tebes ho distribuisaun livrus kurikulum ne’ebe la to’o ba eskola Ensino Baziku sira iha rai laran, maske tinan-tinan governu aloka orsamentu hodi produs livrus. 
Deputadu Estanislao da Silva, hateten tinan-tinan governu tau osan hodi produs livrus, mais realidade eskola barak livru sira ne’e la distribui.
“Hau husu ba komisaun relevante atu haree kona ba distribuisaun livrus sira ne’e,” Deputadu da Silva sujere, iha Parlamentu Nasional.
Deputadu husi bankada Fretilin ne’e hateten, asuntu ida ne’e urgent no komisaun eventual tenke tun halo fiskalizasaun, nune’e bele hatene klean kestaun ne’ebe sai impedementu ba distribuisaun livrus ne’e.
“Tanba informasaun ne’ebe hau hetan, katak livru sira ne’e dala barak la distribui, hanesan iha distritu Baucau, livrus sira rai deit iha armajen laran,” Deputadu da Silva proekupa.
Tuir nia, labele akontese hanesan ne’e tanba governu gasta osan ba edukasuan ne’ebe diak ba labarik sira.
Entretantu membru Komisaun F (edukasaun, saude,kultura, veteranus no igualidade jeneru), Deputada Ilda Maria da Conceicao, hateten livru sira ne’e seidauk halo distribuisaun ba eskola sira, tanba la kondis ho situasaun Timor nian.
“Lolos Ministeriu Edukasaun tenke haree pajina ida ne’ebe la kondis, hadia tiha, nune’e bele fahe ba eskola sira,” Deputada husi bankada Fretilin ne’e hateten.
Vise Ministru hateten livru manual balun la kondis ho realidade ne’ebe iha, tanba ne’e mak seidauk distribui,” Deptada ne’e hateten.
Entretantu tuir Koordenador rede edukasaun Timor-Leste Coalition For Education (TLCE), Matias dos Santos, hateten sira seidauk identifika lolos eskola hira mak seidauk hetan livrus.
“Iha informasaun ne’ebe ami nia membrus iha distritu relata mai ami, katak eskola balun iha area remotas seidauk hetan distribuisaun livru husi Ministeriu Edukasaun,” Koordenador dos Santos hateten.
Aliende ne’e nia dehan, maske eskola balun hetan ona livrus, maibe profesores mak laiha atu hanorin estudante sira.
“Ministeriu Edukasaun tenke hadia jestaun ne’ebe mak diak, atu nune’e livru sira ne’e bele to’o iha eskola hotu,” nia sujere.
