Tribunal Distrital Dili halo julgamentu ba kazu violensia domestika e dala ida ne’e ho kazu tanba lakohi rona oan tanis hodi halo barulhu iha uma laran, arguido FB (la’en) baku no tebe lezada LB (fen) to’o oin bubu.
Kazu ne’e rasik akontese iha dia 20 de Abril 2013. Lezada LB deklara iha tribunal, katak arguido sempre halo hahalok ida ne’e wainhira rona labarik (oan rasik) tanis.
Liu-liu , nia dehan, bainhira arguido nonton hela televizaun ou halo hela servisu kantor nian mak rona labarik tanis, LB sempre sai vitima.
“Nia la gosta labarik ida, tanis mos nia lagosta, ba atrapalha mos nia la gosta, ne’e maka hau dehan “o sai husi uma ne’e deit ona”, maibe nia uja telefone tuda hau no dada hau nia fuuk no tebe hau,” lezada LB deklara iha TDD, iha Mandarin, Dili.
Lezada deklara tan katak nia servisu barak liu kompara ho arguido, tanba tenke fase ropa, tein meudia arguido fila mai han, hare labarik, lori labarik ba eskola, hamoos uma laran no seluk tan.
“Hau hakarak nia fila mai uma, nia mos tenke hare labarik, kous no halimar nune’e hau bele deskansa oituan, maibe ne’e mos labele hotu,” lezada LB hateten.
Durante kazu ne’e prosesa hela iha tribunal, arguido ho lezada la hela hamutuk, LB hela ho nia inan aman nia uma, enkuantu FB hela ho oan primeiru iha sira nia uma.
Entretantu arguido FB iha nia deklarasaun iha TDD, rekonese katak nia halo hahalok ida ne’e ba lezada tanba stress ho servisu kantor nian, maibe ho akontesementu ida ne’e nia arepende.
Arguido mos husu ba lezada atu fila fali mai sira nia uma hodi moris hamutuk hanesan uluk.
“Hau sei la halo tan hanesan uluk, hau foin sadar katak hau egois liu durante ne’e,” arguido FB arepende.
Hafoin haree ba deklarasaun lezada no arguido, Juis Prezidente Duarte Tilman ne’ebe diriji julgamentu iha momentu ne’eba deside fo pena suspensaun tinan ida ba arguido.
