Problema rai nunka hetan nia solusaun liu husi mediasaun no sempre prosesa liu husi dalan formal, hanesan akontese ba arguido BC (subrinhu) ne’ebe haksesuk malu rai pedasuk ida ho vitima GB (tiun) hodi lori malu ba iha tribunal.
Kazu ne’e rasik akontese iha suku Becora, iha dia 31 Maiu 2011. Vitima GB deklara iha tribunal, katak iha dadersan tuku 06 madrugada, arguido BC ho badain lori tali hodi sukat rai, sein konesementu husi vitima hanesan nain ba rai ne’e.
Vitima GB hateten, rai ne’e atu fo ba vitima nia oan mane bo’ot, ne’ebe agora dadaun eskola hela iha Indonezia.Tanba ne’e vitima la autoriza see deit atu mai halo to’os ou halo uma iha fatin refere.
“Rai ne’e hau nian, agora nia mai atu foti hodi halo uma, tanba hau hirus nia foti kadeira tuda hau to’o hau baixa iha ospital,” vitima GB deklara, iha Tribunal Distrital Dili.
Vitima ne’ebe hanesan arguido nia apa nia alin rasik, hateten antes vitima nia apa mate rai ne’e fahe kedas onano rai ne’ebe agora dadaun vitima ho arguido hadau malu ne’e, vitima nian duni, so ke sertifikadu mak seidauk iha.
Entretantu testamunha SF (vitima GB nia maun rasik), deklara iha tribunal katak rai ne’e vitima nian inklui uma ne’ebe agora dadaun nia hela ba ne’e, maske uma ne’e inan aman nian tanba vitima GB mak hanesan oan ikun, entaun entrega ba nia.
“Tanba ami nia inan sei moris no hela ho nia, entaun nia mak hein no uma ho rai ne’e fo ba nia hotu,” testamunha SF deklara iha tribunal.
Enkuantu arguido BC deklara iha tribunal, katak intensaun atu foti rai ne’e, hodi halo uma ba nia ho nia fen hela, tanba durente ne’e hela ho nia banin, no loron-loron istoria malu deit.
“Hau husu ba tiun, maibe tiun la fo ne’ebe hau nervosu hau baku tiun ne’e,” arguido BC deklara.
Nia dehan, hahalok ne’ebe nia halo ba vitima ne’e, tanba stress ho problema uma laran nian, problema ho nia fen.
Hafoin rona deklarasaun husi vitima, arguido no testamunha, Juis Prezident, José Maria de Araújo, deside katak rai ne’e vitima nian duni no husu ba arguido atu selu multa, tanba wainhira arguido baku vitima, vitima konsege hetan tratamentu iha ospital durante loron tolu.
