Parlamentu Nasional liu husi Komisaun C konvoka seminariu internasional ho espesialista sira husi internasional kona ba Timor-Leste tama no sai membru ASEAN nian.
“Ita sempre temi adezaun ba ASEAN, maibe ita seidauk hatene nia implikasaun ekonomiku finanseiru,” Prezidente Komisaun C (finansas publika), Deputadu Virgilio Maria Dias Marcal hateten, iha Parlamentu Nasional.
Nia informa, iha seminariu ne’e focus liu ba komprimisiu ASEAN nian kona ba bens de servisu, kooperasaun ekonomika iha organizasaun Asia, akordu delivre sirkulasaun trabalhadores nasaun hirak ne’ebe integra iha Asia inklui livre komersiu ho harmonizasaun lejislativa.
Topiku hirak ne’e, nia hatutan, aprezenta husi ema espesialista sira husi internasional iha seminariu ne’e.
“Ami hare katak seminar internasional ne’e importante tebes-tebes, deputadu sira bele partisipa kona ba implikasaun ekonomiku finanseiru wainhira ita adezaun ba ASEAN,” nia hateten.
Seminariu ne’ebe hahu iha loron 12 to’o 14 Fevereiru ne’e partisipa husi Ministeriu Negosiu Estranjeiru no Koperasaun(MNEK), Sekertariu Estadu Asuntu ASEAN inklui membrus Parlamentu Nasional.
Entretantu Deputadu Arao Noe, hateten Komisaun A la partisipa seminar ne’e, tanba iha loron ne’ebe hanesan komisaun sei apresia ba Lei komunikasaun Sosial ne’ebe oras ne’e dadauk iha meja Komisaun A nian.
“Seminar ne’e mos importante maibe lei ne’e tama ona iha Parlamentu fulan Setembru tinan kotuk kedas, ami presiza diskuti,” membru Komisaun A ne’e hateten.
Aleinde ne’e Vise Prezidenti Parlamentu Nasional , Deputadu Aderito Hugo, husu ba deputadu sira tenke partisipa ativu iha seminar loron tolu ne’e, tanba topiku ne’e atual tebes ba kondisaun Timor-Leste nian.
“Ita hatama ona ita nia rekerimentu atu sai membru ASEAN iha 2010 liu ba, ita sei iha faze atu inteira didiak, atu familariza ita nia an ba benefisiu, vantajen no des vantajen ne’ebe mak iha,” Vise PN ne’e hateten.
