National Eyes Center (NEC) fahe oklu matan minus nian ho gratuita ba ema vulneravel sira ne’ebe matan min ona, ajuda sira atu bele hare moos.
Responsavel NEC, doutor Marcelino Correia, hateten oklu ne’e sira fahe gratuita ba ema sira ne’ebe kbi’it la to’o, la’os ba ema riku.
“Ba sira ne’ebe iha kbi’it tenke sosa, nune’e bele apoia fali programa ne’e,” doutor Coreia hateten, iha Bidau, Dili.
Nia dehan, iha oklu oin-oin no ho folin ne’ebe la hanesan, balun fa’an ho presu $25,00 to’o $40,00.
Nia hatutan, katak programa operasaun matan no oklu sira ne’e hetan apoiu husi organizasaun internasional sira iha New Zealand, Australia no hetan apoiu medikamentus husi governu rasik.
Entretantu reprezentante povu iha Uma Fukun Parlamentu Nasional, Deputadu Eladio Faculto, apresia ho programa ida ne’e, maibe importante mak fo tratamentu ne’ebe adekuadu ba komunidade sira.
Nia deha, oklu la’os solusaun atu resolve problema matan, importante mak tratamentu kurativu ba komunidade sira nune’e sira labele lakon konfiansa ba servisu medikus sira nian.
“Primeiru tenke halo ezaminasaun ne’ebe klean ba ema nia matan hafoin fo oklu, tanba medikus la’os fo oklu deit tenke halo kurativu ba ema nia matan karik iha infeksaun ruma,” nia dehan.
Membru Komisaun F (saude, edukasaun, kultura, veteranus no igualidade jeneru) ne’e mos husu ba Ministeriu Saude atu haforsa servisu Sentru Nasional Matan nian, tanba oras ne’e dadaun sei menus fasilidade no rekursu humanu.
