Jerente Programa Advokasia Fundasaun Alola, Maria Barreto, hateten durante ne’e maioria trabalhador feto sira iha setor privadu la hetan sira nia direitu ba lisensa maternidade (fulan tolu) tuir lei do trabalho, tanba tauk koa salario. 
Bazeia ba peskiza ne’ebe iha, nia dehan, maioria trabalhador feto sira hetan linsensa maternidade ho durasaun fulan ida ou loron hat deit fila ba servisu, tanba se la’e sira nia osan fulan koa barak liu.
“Konsekuensia ba trabalhadora sira ne’ebe hetan lisensa maternidade konserteza, sira nia salariu la simu full,” Jerente Barreto hateten, bainhira halo aprezentasaun rezultadu peskiza kona ba suntu ne’e, iha Fundasaun Alola, Mascarenhas, Dili.
Nia hateten, iha empregador barak mak hasai lia fuan at hasoru trabalhadora sira hanesan tolok bainhira empregador sira hirus no la fo sira fila ba uma fo susu oan iha oras servisu.
Aleinde ne’e sira mos preokupa tanba trabalhadora sira nia servisu fatin laiha seguransa, saude no hijene ne’ebe diak ba feto sira.
Entretantu Sekretaria Estado ba Promosaun Igualidade (SEPI), Idelta Maria Rodrigues, rekonese katak trabalhador feto barak mak sei hasoru problema iha servisu fatin, sira la brani hato’o keixa, tanba sira laiha konesementu kona ba lei trabalhu no balun tanba tauk lakon servisu.
Tanba ne’e nia husu ba instituisaun hotu, tantu governu no sosiedade sivil presiza fo atensaun ba problema ne’e, liu –liu trabalhador sira ne’ebe servisu iha loja no kompania sira.
“Ita presiza fo nafatin forsa ida ba feto sira, atu sira bele hatene sira nia direitu liu –liu maternidade, sira labele foti to’o fulan tolu, foti deit fulan ida, tanba koa sira nia salariu,” SE Rodrigues hateten.
Hatan ba kesaun ne’e Sekretario Estado Politika Formasaun Profesional e Empregu (SEPFOPE), Elidio da Costa Ximenes, katak sosializasaun lei du trabalhu seidauk masimu no presiza tempu ne’ebe naruk atu hato’o artigu pur artigu husi lei ne’e ba trabalhador sira inklui empregador sira.
Nia dehan, iha artigu 59 ; koalia kona ba trabalahdor feto iha direitu ba lisensa maternidade durante fulan tolu no la afeta ba iha vensimentu, maibe realidade iha empregador balun sei viola.
“Hau rekonese sira hatene sira nia direitu, maibe espesifiku artigu pur artigu ita presiza sosializa, tenke servisu hamutuk ho ami iha area ida ne’e,” nia dehan.
Iha tinan ida ne’e (2014), nia dehan, SEPFOPE sei haforsa tan servisu inspesaun jeral nian atu bele halo inspesaun ne’ebe rigorozu liu tan ba iha empregador sira, nune’e bele garantia implementasaun lei do trabalhu.
