Membru Parlamentu Nasional kestiona maka’as servisu Ajensia Dezenvolvementu Nasional (AND) ne’ebe sosa karteiras ba eskola sira ho orsamentu 2014 nian, tanba tuir lei sira nia papel mak sertifika no halo supervizaun ba projetu ne’ebe mak hala’o iha rai laran.
Deputada Josefa Alvares Pereira Soares, hateten tuir lolos karteiras ba eskola sira ne’e husi aprovizionamentu Ministeriu Edukasaun nian mak sosa.
“Ami hakarak husu deit esklaresimentu ida kona ba $26,500 miloens ne’ebe ita bo’ot sira tau fali iha ADN atu sosa karteiras ne’e,” Deputada husi bankada Fretilin ne’e kestiona, iha Parlamentu Nasional.
Deputada ne’e duvida, katak iha buat ruma mak la’o lalos ona iha aprovizionamentu Ministeriu Edukasaun nian, hodi Primeiru MInistru fo fiar fali ba iha AND sosa karteiras.
“Senhor Perimeiru Ministru ita bo’ot la konfia ona sistema aprovizionamentu iha Ministeriu Edukasaun, KAK no inspector jeral tenke funsiona, para buat hotu la’o tuir regras,” Deputada Soares sujere.
Iha fatin hanesan membru Komisaun F (edukasaun, saude, kultura, veteranus no igualidade jeneru), Deputadu Eladio Faculto, sujere ba Primeiru Ministru atu tau atensaun maka’as ba iha kondisaun eskolas ne’ebe mak la favoravel iha teritorio tomak.
“Ita nia oan sira barak sei tur iha rai, ida ne’e ita la bele kontinua nafatin,” Deputadu husi bankada Fretilin ne’e hateten.
Tuir nia, rekursu humanus mak hanesan sai xavi importante ba nasaun ida nian, tanba ne’e tenke kria kondisoens ne’ebe diak ba estudantes, nune’e prosesu aprendizajen la’o ho diak.
“Tenke hasa’e dignidade labarik sira nian hodi tur fali iha kadeira,” nia hato’o.
Hatan ba kestaun ne’e, Primeiru Ministru (PM), Kay Rala Xanana Gusmao, katak $26,500 miloens ne’e tama iha kapital menor.
Nia dehan, problema faltas meja no kadeiras iha eskola sira hanesan moras kankru ida ne’ebe nunka konsege kura.
“Hau rasik mos lakohi atu hare tan iha tinan 2014 ne’e labarik sira tur iha rai, hau husu tiha ba ministeriu edukasaun kona ba total karteiras hamutuk 82 karteiras,” PM Gusmao hateten.
PM Gusmao hateten, dadus kona ba kondisoens iha eskolas iha teritoriu tomak rekolha hotu ona, enkuantu husi total $26,500 kada eskola sei hetan $7 miloens hodi sosa karteiras ba estudantes.
“Hau nudar xefe governu, hau simu responsabilidade ne’e, tinan ida ne’e laiha tan eskola mak bee la tama no ahi laiha,” PM Gusmao hato’o.
